बर्दिया बैशाख ६ गते । नेपाल रेडक्रस सोसाइटी ठाकुरबाबा उपशाखाले क्वारेन्टका लागि आवश्यक सामाग्री उपलव्ध गराएको छ । क्वारेन्टाइन व्यवस्थापनका लागि आवश्यक पर्ने तन्ना १ सय ७५ थान, झुल १ सय ७५ थान, पानी खाने मग १ सय ७५ थान, बाल्टी १ सय थान, जग ७५ थान, गिलास ५० र कचौरा ३८ थान उपलब्ध गराएको नेपाल रेडक्रस सोसाइटी ठाकुरबाबा उपशाखाका सभापति यज्ञ नेपालले जानकारी दिए । मजदुरीका लागि जिल्ला बाहिर गएका मजदुरहरु घर फर्कने क्रम बढेसँगै यहाँ क्वारेन्टाइनको संख्या पनि बढाइएको छ । यसअघि ठाकुरबाबा नगरमा एउटा मात्र क्वारेन्टाइन स्थापना गरिएको थियो । बाहिरबाट आउने व्यक्तिको संख्या बढेसँगै ठाकुरबाबा नगरपालिकामा थप ३ वटा क्वारेन्टाइन स्थापना गरिएको छ ।
हाल ठाकुरबाबा नगरपालिका क्षेत्रमा त्रिभुवन मावि भुरिगाउँ, जगदम्बा मावि मढेला, चूरे मावि बगनाहा र जनज्योती मावि बकुवामा क्वारेन्टाइन स्थापना गरिएको छ । सबै क्वारेन्टाइनमा ५० वटा वेडको व्यवस्था गरिएको ठाकुरबाबा उपशाखाका सभापति यज्ञ नेपालले बताए ।
जिल्ला प्रशासन कार्यालय बर्दियाले लकडाउनको बेला ज्याला मजदुरी गरेर घर फर्केका सबैलाई १४ दिन अनिवार्य क्वारेन्टाइनमा बस्नुपर्ने नियम लागू गरेको छ ।
Discussion about this post