खोजखबर संवाददाता
बाँके, साउन२४ गते । नेपालगञ्जको विपिचोकमा रहेका फर्निचर पसल र उद्योगहरुमा बिहिबार राती भिषण आगलागी भएको छ । सो आगलागीमा परेर १३ वटा उद्योग, गोदाम र पसल नष्ट भएका छन् ।
लहरै रहेका फर्निचर पसलहरुमा विद्युत सर्टसर्किट भएर आगलागी भएको अनुमान गरिएको प्रहरीले जनाएको छ ।
बिहीबार राती ११ बजेतिर लड्डन सिद्दिकीले सञ्चालन गरेको न्यू एवान फर्निचर पसलबाट सुरु भएको आगोले आसपासमा रहेका अन्य १२ वटा फनिर्चर, गोदाम, उद्योग र पसल जलेर नष्ट भएको जिल्ला प्रहरी कार्यालय बाँकेले जनाएको छ ।
आगलागीमा परेर कुनै मानविय क्षति नभएपनि करिव ५ करोडको धनमाल नष्ट भएको व्यवसायीहरुले बताएका छन् ।
सो आगलागी नियन्त्रणमा लिनको लागि नेपालगन्ज, कोहलपुर, नेपालगन्ज विमानस्थल, र बर्दियाको गुलरिया नगरपालिकाको दमदमकल, नेपाल प्रहरी, नेपाली सेना, सशस्त्र प्रहरी र स्थानीयको सहयोगमा शुक्रवार बिहान ५ बजे मात्र नियन्त्रणमा आएको थियो ।
आगलागिबाट हिमालय स्टिल फर्निचर उद्योग, सानिया स्टिल फर्निचर उद्योग, स्टार स्टिल फर्निचर उद्योग, वारसी फर्निचर उद्योग, बिन्देश्वरी फर्निचर उद्योग, न्यू रुबी फर्निचर, प्रतापसिंह फर्निचर, आलिया फर्निचर, अमन फर्निचर, ए–वान फर्निचर, वावा फर्निचर, बाबा टे«र्डसर सरदार डेण्टल क्लिनीक पूर्ण रुपमा जलेर नष्ट भएका छन् ।
दमकल समयमा नआउँदा व्यवसायी आक्रोशित
एक किलोमिटरको दुरीमा रहेको दमकल आगलागि भएको खबर गरेको ४५ मिनेटपछि मात्र पुगेको पिडितहरुको गुनासो छ । ढिलैगरि पुगेको दमकलमा पानी समेत नरहेको जनाउँदै समयमा दमकल आएको भए क्षति रोकिन सकिने पिडित व्यवसायीले बताएका छन् । कोहलपुर र राँझाबाट समेत दमकल बोलाउन सम्बन्धित निकायले ढिलाई गरेको उनिहरुको आरोप छ ।
पिडितहरुले आक्रोशित हुँदै कहिले पनि दमकल समयमा नपुगने गरेको बताएका छन् । मात्र एक किलो मिटरको दुरीमा रहेको दमकल समयमा पुगेको भए धेरै उद्योग जोगिन सक्ने उनिहरुको भनाई छ ।
नेपालगञ्ज उद्योग बाणिज्य संघका अध्यक्ष नन्दलाल वैश्यले दमकलको सेवा राम्रो नभएको गुनासो गर्दै त्यसमा तत्काल सुधार गर्नु पर्ने माग गर्दै थप २ वटा दमकलको व्यवस्था गर्न मेयरसंग अनुरोध गरे ।
यसअघि मंगलवार राती पनि घरबारीटोलमा आगलागि हुँदा २ वटा पसल जलेर खरानी भएका थिए । त्यहाँ डेढ करोडको क्षति भएको थियो ।
Discussion about this post