खोजखबर संवाददाता
बाँके साउन २४ गते । यहाँस्थित नेपाल-भारत सीमानाको रुपैडिहामा एउटा नेपाली नम्बरको ट्यांकरले नेपाली नम्बरको मोटरसाइकललाई ठक्कर दिंदा मोटरसाइकलमा सवार एक जना महिलाको घट्नास्थलमै मृत्यु भएको छ भने एक अन्य महिला घाइते भएकी छन् ।
भारतबाट तेल बोकेर नेपालतर्फ आइरहेको ना ४ ख ५६०० नम्बरको ट्यांकरले शुक्रवार बेलुका ४ बजे ठक्कर दिंदा भे ४ प ३८२४ नम्बरको मोटरसाइकल ट्यांकरको पांग्रामुनि छिरेको थियो ।
दुर्घटनामा परी घरायसी सामान खरिद गर्न रुपैडिहा गएकी मोटरसाइकल चालक कोहलपुर रामनगर निवासी आशासिंह भट्टराईको ट्यांकरको टायरमुनि च्यापिएर घटनास्थलमै मृत्यु भएको जमुनाहा प्रहरी कार्यालयले जनाएको छ ।
ट्यांकरको टायर झिकेर मात्र शव बाहिर निकाल्न सकिएको रुपैडिहास्थित प्रहरी थानाका प्रमुख मनिष कुमार पाण्डेयले बताए ।
मोटरसाइकलको पछाडी बसेकी जुनुथापा घाइते भएकोले उनको उपचार भारतमा भैरहेको ईलाका प्रहरी कार्यालय जमुनाहाका इन्चार्ज सई माधव रिजालले बताउनु भयो ।
नेपाल भारत नाकामा अत्याधिक सवारीको चाप हुने र एउटै सडकबाट ठुला मालवाहक र साना गाडी तथा रिक्सा र मोटरसाइकलहरु चल्ने भएकोले ने जामका कारण सो दुर्घटना भएको जनाईएको छ ।
दुर्घटनामा परी मृत्यु भएकी भट्टराई नेपाल प्रहरीका पूर्व एसपी जनक भट्टराईकी श्रीमति रहेको बुझिएको पनि प्रहरीले जनाएको छ । मृतक भट्टराईको शवलाई पोष्टमार्टमका लागि भेरी अस्पताल नेपालगन्जमा राखिएको छ ।
क्षतिग्रस्त भएको मोटरसाइकललाई पनि नेपाल प्रहरीको जिम्मा लगाईएको भारतीय प्रहरीले जनाएको छ । दुर्घटना गर्ने ट्यांकर र चालकलाई भने रुपैडिहा थानामा राखिएको छ ।
Discussion about this post