काठमाडौ बैशाख १४ गते । पूर्वस्वास्थ्य राज्यमन्त्री सुरेश यादवले आफूलाई अपहरण गरेको मुद्दा दर्ता गर्न प्रहरीले इन्कार गरेपछि जनता समाजवादी पार्टीका नेता बाबुराम भट्टराईले प्रधानमन्त्री केपी शर्मा ओलीविरुद्ध आक्रोश पोखेका छन ।
सांसद यादवसहित काठमाडौ प्रहरी परिसर टेकुमा मुद्दा दर्ता गर्न पुग्दा प्रहरीले जाहेरी लिन इन्कार गरेपछि भट्टराईले फेसबुकमा प्रधानमन्त्री ओलीविरुद्ध आक्रोश पोखेका हुन ।
केहीदिनअघि राजपालाई फुटाउन मधेसबाट सांसद यादवलाई नेकपाका युवा नेता तथा सांसद महेश बस्नेत, पूर्वआइजिपी सर्वेन्द्र खनाल र किसान श्रेष्ठले घरबाटै उठाएर काठमाडौँ ल्याएका थिए । तर यो कुरा पर्दाफास भएपछि पार्टी फुट्नुको साटो राजपा र समाजवादीबीच एकता भएर जनता समाजवादी पार्टी बनेको थियो ।
यादवलाई अपहरण शैलीमा काठमाडौँ ल्याउने तीनै जनाविरुद्ध मुद्दा दर्ता गर्न प्रहरीले नमानेपछि ओलीकालमा जनताको सुरक्षा र कानुनी राज्यको अनुभूति नहुने बाबुरामको दाबी छ ।
सामाजिक सञ्जाल फेसबुकमा उनी लेख्छन, ‘यत्रो देशविदेश तरंगित गराइरहेको सांसद अपहरणसम्बन्धी मुद्दा पीडित ब्यक्तिले महानगरीय प्रहरी परिसर काठमाण्डौमा समयभित्र विधिसम्मत ढंगले जाहेरी दिन लाग्दा दर्ता गर्न इन्कार गरिन्छ भने ओलीतन्त्रमा कानूनको शासन कायम हुन्छ र नागरिकको जीवनरक्षा हुन्छ भनेर कसरी विश्वास गर्ने ?’
सांसद यादवले आफूलाई मार्न धम्की आएको भन्दै समाजवादीका नेताहरु मुद्दा दर्ता गर्न प्रहरीकहाँ पुगेका थिए । तर प्रहरीले मुद्दा दर्ता गर्न नमानेपछि सांसद यादवको जीवनरक्षा गर्न बाबुरामले आग्रह गरेका छन ।
Discussion about this post