काठमाडौं बैशाख २० गते ।
नेकपाको निर्णायक सचिवालय बैठक बस्नुअघि प्रधानमन्त्री केपी शर्मा ओलीले प्रधानमन्त्री र नेकपाको अध्यक्ष पद दुबै नछाड्ने स्पष्ट पारेका छन । चुनाव जितेर प्रधानमन्त्री भएको र दुई पार्टीको सहमतिमा अध्यक्ष बनेको भन्दै ओलीले कुनै हालतमा पनि प्रधानमन्त्री र अध्यक्ष पद नछाड्ने बताएका छन ।
शनिबार बालुवाटारमा भेला भएका सांसद र केही सञ्चारकर्मीसँग प्रधानमन्त्री ओलीले पार्टीभित्र गम्भिर असहमति देखिएपनि त्यो समाधान गरिने तर पद छाड्न नसकिने बताएका हुन । नागरिकले पाँच बर्षका लागि प्रधानमन्त्री बन्न भोट दिएर पठाएको भन्दै ओलीले केही नेताले चाहदैमा सरकार छाडेर जनतालाई धोका दिन नसकिने दाबी गरेका छन ।
अध्यादेश ल्याउनु बाध्यता भएको पनि ओलीको भनाई छ । साना दलले पटक पटक आफुसँग भेटेर दल फुटाउने व्यवस्था परिवर्तन गर्न आग्रह गरेपछि अध्यादेश ल्याइएको ओलीले बताए । तर अध्यादेश ल्याएर नेकपा फुटाउन खोजेको अर्का अध्यक्ष प्रचण्डको आरोप निराधार रहेको पनि ओलीको टिप्पणी छ ।
नेकपा फुटाउन चाहेको भए अध्यादेश लगत्तै दल फुटिसक्ने पनि उनको भनाई छ । साना दलले माग गरेको अध्यादेश उनीहरुलाई नचाहिने भएपछि फिर्ता गरिएको ओलीले बताए । अध्यादेशलाई बाहना बनाएर आफूलाई अध्यक्ष तथा प्रधानमन्त्री पदबाट हटाउनु खोज्नु मुलुक र पार्टीका लागि दुर्घटना हुने ओलीको चेतावनी छ ।
उनले कोरोनापछि बामदेव गौतमलाई प्रधानमन्त्री बनाउने विषयमा भने कुनै प्रतिक्रिया दिन चाहेनन् । शनिबार बेलुकी नेकपाको सचिवालय बैठक बस्दैछ । अध्यादेशपछिको राजनीतिक संकट समाधानका विषयमा बैठकमा गम्भिर छलफल हुने नेताहरुले बताएका छन ।
Discussion about this post