काठमाडौं जेठ २ गते ।
काठमाडौं लगायतका उपत्यकामा पनि कोरोना संक्रमित थपिन थालेपछि प्रशासनले लकडाउनको स्याडुल परिवर्तन गरेको छ । अहिले सम्म मुख्य सडकमा मात्र सुरक्षार्थमा खटिएका प्रहरी प्रशासन अब काठमाडौं लगायत शहरका गल्लीमा पनि खटिने भएका छन् ।
अब उपत्यकाको शहरका गल्ली भित्र पनि पैदल हिडेको अथवा लकडाउन उल्लंघन गरेको फेला परे प्रहरीले पक्राउ गर्ने भएको छ । जिल्ला प्रशासन कार्यालय काठमाडौंले शुक्रवार एक सूचना जारी गरी लकडाउनमा अब गल्ली भित्र पनि नहिड्न र घरवाट वाहिर ननिस्कन आग्रह गरेको छ ।
गृह मन्त्रलायबाट प्राप्त निर्देशनअनुसार, शुक्रबार दिउँसो बसेको जिल्ला सुरक्षा समितिको बैठकले यस्तो निर्णय गरेको सूचना जारी गरिएको छ । सूचनामा मानिसको अनावश्यक भीड नियन्त्रण गर्न यो नियम लागू गर्ने निर्णय गरेको उल्लेख गरिएको छ ।
प्रशासनले यसअघि जारी भएका सबै ई–पास र पहेँलो रङको पास पनि खारेज भएको बताएको छ । प्रशानसले अब जारी गर्ने पासको रंग पनि परिवर्तन गरेको जनाएको छ । अबको पासको रंग निलो हुने उल्लेख गरिएको छ । प्रशासनले अत्यावश्यक अवस्थामा हिँड्ने गह्रौं सवारीसाधनलाई बेलुकी ८ बजेदेखि बिहान ६ बजेभित्र मात्र हिँड्न दिने पनि भनेको छ ।
एम्बुलेन्स, शव बाहन, औषधि तथा स्वास्थ्य सामग्री, पेट्रोलियम पदार्थ, ग्यास, सबै खाद्य वस्तु, तरकारी तथा फलफूललगायतका सामग्री बोकिएका गाडीले भने बिना पास नै आवागमन गर्न पाउनेछन् ।
Discussion about this post