बैतडी असार ६ गते ।
बैतडीका एकजना क्वारेन्टाइनमै किरियामा बसेका छन्। दोगडाकेदार गाउँपालिका–७ चडेपानीका लीलाधर भट्ट आफ्ना बुवाको किरिया गर्न क्वारेन्टाइनमा बसेका हुन्।
भारतको दिल्लीमा बस्दै आएका भट्ट चार दिनदेखि भूमिराज मावि चडेपानीको क्वारेन्टाइनमा बसिरहेका छन्। भट्टका बुवा चिन्तामणिको ६ दिनअघि निधन भएको हो। केही दिनअघि कञ्चनपुरको गड्डाचौकीबाट उद्धार गरी लीलाधर दोगडाकेदार पुगेका हुन्। उनले घरमै बसेर किरिया गर्न व्यवस्था मिलाउन अनुरोध गरे पनि गाउँपालिकाले नमानेको स्थानीय केशव भट्टले बताए।
भारतबाट आएका सबै नागरिकलाई अनिवार्य १४ दिन क्वारेन्टाइनमा राख्नुपर्ने निर्देशनअनुसार नै लीलाधरलाई क्वारेन्टाइनमा राखेको दोगडाकेदार गाउँपालिकाका स्वास्थ्य शाखा प्रमुख नरेन्द्र नाथले बताए।
लीलाधरको स्वाब संकलन गरी परीक्षणका लागि पठाइएको र १४ दिनअघि नै रिपोर्ट नेगेटिभ आए घर पठाइने नाथले बताए। यसअघि जेठ दोस्रो साता बैतडीको मेलौली नगरपालिका–७ पच्कोराका रामसिंह रावत पनि बुवाको किरिया क्वारेन्टाइनमा बसेका थिए।
Discussion about this post