काठमाडौं असार ६ गते ।
रसुवा सीमा प्रहरी चौकी रसुवाका तत्कालीन प्रहरी निरीक्षक खेमप्रसाद नेपालले हवल्दारसँग मिलेर सुन गायब बनाएको खुलेको छ । अख्तियार दुरुपयोग अनुसन्धान आयोगका अनुसार प्रहरी निरीक्षक नेपालले हवल्दार रामशरण रिमालसँग मिलेर सुन एक आपसमा बाँडेको पुष्टि भएको छ ।
रिमालले गएको मंसिर २२ गते १ सय ११ ग्राम र पुस ११ गते ना ६ ख ४९३२ नम्बरको कन्टेनरबाट ४ सय २२ ग्राम सुन बरामद गरेका थिए । सुन बाँडेको पुष्टि भएसँगै सीमा प्रहरी चौकी टिमुरेका तत्कालीन प्रहरी निरीक्षक नेपालसहित ४ जना विरुद्ध विशेष अदालतमा आरोप पत्र दायर गरिएको आयोगका प्रवक्ता प्रदीपकुमार कोइरालाले बताए ।
उनीहरू विरुद्ध भ्रष्टाचार निवारण ऐन, २०५९ विरुद्धको कसूर गरेको अभियोग लगाइएको छ । यस्तै विगो २६ लाख ५२ हजार रुपैयाँको दोब्बर जरिवाना र कैद सजायको पनि माग गरिएको आयोगले जनाएको छ ।
रिमालले यात्रुबाट ४ सय २२ ग्राम सुन कब्जा गरेको अनुसन्धानबाट खुलेको छ ।
Discussion about this post