रुकुम साउन ४ गते ।
रुकुमपूर्व जिल्लाका भुमे र सिस्ने गाउँपालिकाका स्थानीयले पुल नहुँदा वर्षौंदेखि भोग्दै आएको सास्तीबाट अब छुटकारा पाएका छन् । वर्षाका ६ महिना जोखिम मोलेर रुकुमगाडको रेलीखोला तर्नुपर्ने उनीहरू अब पुलबाटै आउजाउ गर्छन् ।
मध्यपहाडी लोकमार्गअन्तर्गत रुकुमगाड रेलीखोला मोटरेबल पुल झन्डै तीन वर्ष ढिलो गरी सम्पन्न भएको हो । सम्झौताअनुसार २ वर्षअघि नै बनिसक्नुपर्ने पुल गत असार २५ देखि सञ्चालनमा आएको छ । यसले सिस्नेको ५ र भूमेको ४ नम्बर वडालाई जोड्छ ।
ढिलै भए पनि पुल बनेर सवारी सञ्चालनमा आएको मध्यपहाडी लोकमार्ग दैलेख योजना कार्यालयका प्रमुख नारायणप्रसाद निहुरेले बताए । उनका अनुसार विभिन्न कारणले ढिलाइ भएको पुल पछिल्लोपटक सबैको चासो र दबाबमा सम्पन्न भएको हो ।
डिजाइन परिवर्तन गर्नुपरेकाले पुल निर्माणमा ढिलाइ भएको ठेकेदार कम्पनीको भनाइ छ । ३ करोड ७९ लाख २१ हजार ७ सय रुपैयाँ लागतको पुल सम्झौताअनुसार २०७४ असोज २० मै बनिसक्नुपर्थ्यो । तर, ठेकेदार कम्पनी याकथुम्हाङरबीबी जेभी निर्माण सेवाले केही समय पूरै बेवास्ता गर्दा काम अघि बढ्न सकेको थिएन ।
पछिल्लो समय सिस्ने र भूमे गाउँपालिका, जिल्ला प्रशासन र मध्यपहाडी लोकमार्ग सडक आयोजना कार्यालयको निरन्तर दबाबपछि पुल तयार भएको हो । पुल सञ्चालनमा आएपछि मध्यपहाडी लोकमार्गका यात्रुलाई सजिलो भएको भूमे गाउँपालिका अध्यक्ष रामसुर बुढामगरले बताए ।
Discussion about this post