बाँके, भदौ १४ गते ।
बाढी, आगलागी, लु, शीतलहर तथा सम्भावित भूकम्पजस्ता विपद्मा तत्काल खोज तथा उद्धार गर्न बाँकेका स्थानीय तहले स्थानीय जनशक्ति तयार गर्न थालेका छन् ।
बाहिरबाट उद्धार टोली घटनास्थलमा पुग्न समय लाग्ने भएकाले समुदायमै प्रतिकार्य गर्न सक्ने जनशक्ति तयार गरिएको हो ।
नेपालगन्ज उपमहानगरपालिकाका नगर प्रमुख प्रशान्त विष्टले पुराना तथा जीर्ण घर र साँघुरा बस्ती रहेका क्षेत्रमा भूकम्प, बाढी, डुबान र आगलागीको जोखिम रहेकाले दातृ निकायको सहयोगमा चार सयभन्दा बढी दक्ष जनशक्ति तयार गरिएको बताए । ‘बाहिरबाट उद्धार टोली आउन समय लाग्छ । त्यसैले स्थानीयस्तरमै तत्काल उद्धार गर्न सक्ने जनशक्ति आवश्यक छ,’ उनले भने, ‘उनीहरूलाई तालिमसँगै कृत्रिम अभ्याससमेत गराइएको छ ।’
राप्ती सोनारी गाउँपालिकाले पनि सबै वडालाई समेटेर ४९ जना विपद् व्यवस्थापन स्वयंसेवक तयार गरेको छ । गाउँपालिका अध्यक्ष तप्त पौडेलले बाढी, डुबान, आगलागी र भूकम्पका बेला सुरक्षाकर्मी वा बाह्य उद्धार टोली पुग्नुअघि नै स्थानीयस्तरबाट प्रतिकार्य गर्न स्वयंसेवक तयार गरिएको बताए । ‘बाढीमा फसेकाको उद्धार, आगलागी नियन्त्रण र घाइतेलाई प्राथमिक उपचार गर्नेसम्मका सीप भएका स्वयंसेवक तयार भएका छन्,’ उनले भने ।
राप्ती सोनारीले सशस्त्र प्रहरी बलको ४२ नम्बर रिजर्व गण शम्शेरगञ्जसँगको साझेदारीमा १८ दिने तालिम सञ्चालन गरेको थियो । गणका प्रमुख सशस्त्र प्रहरी उपरीक्षक श्याम रावतका अनुसार स्वयंसेवकलाई बाढीमा फसेकाको उद्धार, आगलागी नियन्त्रण, पानी प्रयोग गर्न नमिल्ने अवस्थामा आगो निभाउने तथा भूकम्पपछि भत्किएको संरचनाबाट घाइते निकाल्नेसम्मको अभ्यास गराइएको छ ।
राप्ती सोनारी–३ का वडाध्यक्ष मिनकुमार चौधरीले बाह्य उद्धार टोलीको भर पर्नुभन्दा स्थानीय समुदायलाई नै विपद् प्रतिकार्यका लागि तयार गर्नु प्रभावकारी भएको बताए ।
Discussion about this post