बाँके, भदौ १४ गते ।
बजाज अटो लिमिटेडले नेपालमा चेतकका दुई नयाँ विद्युतीय स्कुटर सार्वजनिक गरेको छ। कम्पनीले चेतक सी२५०१ र सी३५०३ बजारमा ल्याएको हो।
बजाजका दुईपांग्रे सवारीसाधनको नेपालका लागि आधिकारिक वितरक हंसराज हुलासचन्द एन्ड कम्पनी लिमिटेडसँगको सहकार्यमा नेपालगन्जस्थित पानस मोटर्स प्रालिमा दुवै स्कुटर सार्वजनिक गरिएको हो।
सी२५०१ मा २.५ किलोवाट घण्टा क्षमताको लिथियम–आयन ब्याट्री छ। कम्पनीका अनुसार यसले एकपटकको पूर्ण चार्जमा ११३ किलोमिटरसम्म यात्रा गर्न सक्छ। यसको अधिकतम गति प्रतिघण्टा ६० किलोमिटर छ। ब्याट्री शून्यबाट ८० प्रतिशतसम्म चार्ज गर्न २ घण्टा २५ मिनेट लाग्ने कम्पनीले जनाएको छ।
स्कुटरमा रङ्गीन एलसीडी पर्दा, ब्लुटुथ जोड्ने सुविधा, सङ्गीत नियन्त्रण, पछाडि चलाउने सुविधा र सिटमुनि २५ लिटर क्षमताको सामान राख्ने स्थान छ। सी२५०१ को मूल्य २ लाख ८१ हजार ९ सय रुपैयाँ तोकिएको छ।
त्यस्तै, सी३५०३ मा ३.५ किलोवाट घण्टा क्षमताको लिथियम–आयन ब्याट्री प्रयोग गरिएको छ। यसले एकपटकको पूर्ण चार्जमा १५१ किलोमिटरसम्म यात्रा गर्न सक्ने कम्पनीको दाबी छ। यसको अधिकतम गति प्रतिघण्टा ७० किलोमिटर छ। यसमा सिटमुनि ३५ लिटर क्षमताको सामान राख्ने स्थानसहित डिजिटल पर्दा, ब्लुटुथ र फोन तथा सन्देशको सूचना प्रणाली छ।
सी३५०३ को मूल्य ३ लाख ३९ हजार १ सय रुपैयाँ तोकिएको छ। यो चार रङमा उपलब्ध हुनेछ।
नयाँ स्कुटर सार्वजनिक गर्दै हंसराज हुलासचन्द एन्ड कम्पनी लिमिटेडका महाप्रबन्धक पुगेन्द्र श्रेष्ठले नेपाली ग्राहकको बदलिँदो आवश्यकता र जीवनशैलीलाई ध्यानमा राखेर नयाँ मोडल ल्याइएको बताए।
‘गत वर्ष चेतकले पाएको प्रतिक्रियापछि दुई नयाँ मोडल ल्याएका हौं,’ उनले भने, ‘यसले विद्युतीय सवारीसाधनमा ग्राहकलाई थप विकल्प दिनेछ।’
कम्पनीका अनुसार दुवै स्कुटर नेपालभरका छनोट गरिएका बजाज विक्रेताबाट बुकिङ गर्न सकिनेछ। नेपाल गतिशीलता प्रदर्शनी २०२६ मा समेत दुवै मोडल प्रदर्शनमा राखिने जनाइएको छ।
Discussion about this post