बाँके, भदौ १३ गते ।
श्रम संस्कृति पार्टीका अध्यक्ष हर्कराज साम्पाङले आफ्नो पार्टीमा नेता र कार्यकर्ता नभई ‘श्रमदाता’ मात्रै हुने बताएका छन्। उनले भाषण र आश्वासनभन्दा प्रत्यक्ष श्रम र परिणाममा विश्वास गर्ने पार्टी आफूहरूले निर्माण गरिरहेको दाबी गरे।
नेपालगन्जमा आयोजित पार्टीको बृहत् अगुवा श्रमदातासँग हातेमालो तथा पार्टी प्रवेश कार्यक्रममा सम्बोधन गर्दै साम्पाङले भने, ‘श्रम संस्कृति पार्टी रगत बगाउने होइन, पसिना बगाएर देश निर्माण गर्ने पार्टी हो।’
उनका अनुसार नेपालको समृद्धिको मुख्य आधार श्रम हो। श्रमलाई जीवन र समाज निर्माणसँग जोड्न नसकेसम्म मुलुकले वास्तविक समृद्धि हासिल गर्न नसक्ने उनको भनाइ थियो। ‘हाम्रो पार्टीमा नेता र कार्यकर्ता हुँदैनन्, यहाँ श्रमदाता हुन्छन्,’ साम्पाङले भने, ‘हामी भाषणमा होइन, काममा विश्वास गर्छौं।’
उनले आफू पनि श्रमकै माध्यमबाट राजनीतिमा स्थापित भएको बताए। काम गरेर विश्व कीर्तिमान बनाएको उल्लेख गर्दै उनले श्रमदाता बन्न सहज नभएको बताए। साम्पाङले आफ्नो राजनीतिक मान्यता साँचो कुरा बोल्नु रहेको बताए। सत्यलाई घुमाएर नभई जस्ताको तस्तै प्रस्तुत गर्ने दाबी गर्दै उनले सेतोलाई सेतो र कालोलाई कालो भन्न सक्ने स्पष्ट लक्ष्य र उद्देश्य पार्टीले बोकेको बताए। ‘हामी सत्यलाई घुमाएर बोल्दैनौँ। सेतोलाई सेतो र कालोलाई कालो भन्नुपर्छ,’ उनले भने।
उनले राजनीतिलाई भाषण, आश्वासन र आरोप–प्रत्यारोपमा सीमित नगरी प्रत्यक्ष श्रम र परिणामसँग जोड्नुपर्ने बताए। देश निर्माणमा नागरिक स्वयं श्रमसँग जोडिनुपर्ने उनको जोड थियो।
बाढीपीडितको उद्धार र राहत प्राथमिकतामा
कार्यक्रममा साम्पाङले भोटेकोशीमा आएको बाढीबाट भएको जनधनको क्षतिप्रति दुःख व्यक्त गरे। मुलुक बाढी र पहिरोका कारण शोकमा रहेका बेला नेपालगन्जमा कार्यक्रम गर्नुपरेको भए पनि कार्यक्रम पूर्वनिर्धारित भएकाले आयोजना गरिएको उनले स्पष्ट पारे। उनले अहिलेको अवस्थामा घाइतेको उद्धार, मृतकको शव व्यवस्थापन, राहत र पुनःस्थापना नै पार्टीको प्राथमिकता रहेको बताए।
आफू व्यक्तिगत रूपमा बाढी प्रभावित क्षेत्रमा उपस्थित हुन नसके पनि पार्टीका नेता तथा श्रमदाता प्रभावित क्षेत्रमा पुगेर उद्धार र राहतमा सक्रिय रहेको उनले जानकारी दिए। सरकारलाई आवश्यक सहयोग गर्न पनि पार्टी तयार रहेको उनको भनाइ थियो।
प्राकृतिक विपत्तिका बेला राजनीतिक आरोप–प्रत्यारोपभन्दा मानवीय सहयोग महत्वपूर्ण हुने बताउँदै उनले सबैलाई आफ्नो क्षमताअनुसार सहयोग गर्न आग्रह गरे। बाढीपीडितका नाममा पार्टीले छुट्टै राहत संकलन नगरेको पनि उनले स्पष्ट पारे। प्रधानमन्त्री बाढीपीडित कोषको उल्लेख गरेर मात्रै पार्टीले राहत संकलन गर्ने उनको भनाइ थियो। ‘विपत्तिको समयमा आरोप–प्रत्यारोप गर्ने होइन, संकटमा परेका नागरिकको उद्धार र पुनःस्थापनामा लाग्नुपर्छ,’ उनले भने।
प्रकृति, संस्कृति र प्रविधिसँग जोडियो समृद्धिको बहस
साम्पाङले समृद्धिको बहसलाई प्रकृति, संस्कृति र प्रविधिसँग जोडेर हेर्नुपर्ने बताए। यी तीन पक्षबीच सन्तुलन कायम गर्न सके मात्रै जीवन सार्थक र समाज दिगो बन्ने उनको भनाइ थियो। ‘प्रकृति, संस्कृति र प्रवृत्ति हाम्रो दर्शन हो,’ उनले भने।विकासका नाममा प्रकृतिको विनाश र प्रविधिको अन्धाधुन्ध प्रयोग स्वीकार्य नहुने उनको भनाइ थियो।
चार सयभन्दा बढी पार्टी प्रवेश
नेपालगन्जमा आयोजित कार्यक्रममा मुस्लिम नेतृ कश्मिरा खातुन, नेता मोहम्मद इम्तियाज राईलगायत चार सयभन्दा बढी व्यक्ति श्रम संस्कृति पार्टीमा प्रवेश गरेको कार्यक्रम संयोजक राजन राना मगरले जानकारी दिए। खातुन नेपाली कम्युनिष्ट पार्टीबाट श्रम संस्कृति पार्टीमा प्रवेश गरेकी हुन्।
कार्यक्रममा पार्टीकी केन्द्रीय उपाध्यक्ष आशा लामा, केन्द्रीय प्रशिक्षण विभाग प्रमुख शान्ती गुरुङ, लुम्बिनी प्रदेश अध्यक्ष तुलबहादुर दलामी मगर, केन्द्रीय सदस्य देविराज गरन्जा, धनबहादुर विकलगायतको उपस्थिति थियो। 
Discussion about this post