बाँके, भदौ १३ गते ।
भोटेकोशी नदीमा आएको बाढीबाट प्रभावितको सहयोगका लागि नेपालगञ्जका विभिन्न मस्जिदमा २ लाख ६७ हजार ५०८ रुपैयाँ संकलन गरिएको छ।
शुक्रबार जुमाको नमाजका लागि मस्जिदमा भेला भएका मुस्लिम समुदायबाट बाढीपीडितका लागि सहयोग रकम संकलन गरिएको हो।
मुस्लिम अगुवा मेराज अहमद हिमालयले रसुवा, नुवाकोटलगायतका बाढी तथा विपद् प्रभावितको सुरक्षा, उद्धार र राहतका लागि नेपालगञ्जका विभिन्न मस्जिदमा सहयोग रकम संकलन गरिएको बताए। उनका अनुसार जुमाको नमाजपछि बाढी तथा विपद् प्रभावितको सहजताका लागि सामूहिक दुआसमेत गरिएको थियो।
हिमालयले विभिन्न मस्जिदबाट संकलन भएको २ लाख ६७ हजार ५०८ रुपैयाँ प्रमुख जिल्ला अधिकारीमार्फत प्रधानमन्त्री दैवी प्रकोप उद्धार कोषमा पठाइएको बताए।
मदरसा फैजुन्नबी जामा मस्जिद तथा ईदगाह सञ्चालक समितिका अध्यक्ष मोहम्मद अयुब सिद्दिकीका अनुसार जामा मस्जिदबाट १ लाख ५१ हजार, मदिना नुरी मस्जिदबाट ४८ हजार ३७५, नेपाली मस्जिदबाट ४७ हजार १३३ र मक्का मस्जिद, घरबारी टोलबाट २१ हजार रुपैयाँ संकलन भएको हो।
सिद्दिकीले चारवटा मस्जिदबाट गरी कुल २ लाख ६७ हजार ५०८ रुपैयाँ संकलन भएको बताए।
सहयोग रकम संकलनमा मुस्लिम अगुवा मेराज अहमद हिमालयको अगुवाइमा मुस्लिम युवा जियाउल हक, इरफान अहमद सिद्दिकी, कामिल हलवाइ, अयुब हलवाई, साहिल अन्सारी, सद्दाम हलवाईलगायत सहभागी भएका थिए।
Discussion about this post