बाँके, भदौ १३ गते ।
भोटेकोशी नदीमा आएको बाढीबाट प्रभावित रसुवा र नुवाकोटका परिवारको राहत तथा उद्धारका लागि नेपालगन्जका मुस्लिम अगुवा तथा समाजसेवीले ४ लाख ६२ हजार रुपैयाँ सहयोग गरेका छन्।
नेपालगन्जका व्यवसायी तथा समाजसेवी शकील अहमद जसगढले २ लाख ११ हजार रुपैयाँ सहयोग गरेका छन्। नेपाल ज्वेलर्सका सञ्चालकसमेत रहेका जसगढले बाढीपीडितको राहत तथा उद्धारमा केही सहयोग पुगोस् भन्ने उद्देश्यले रकम प्रदान गरेको बताए। ‘विपत्तिमा परेका नागरिकलाई आफ्नो तर्फबाट सकेको सहयोग गर्नुपर्छ भन्ने लागेर यो रकम दिएको हुँ। रकमले पीडित परिवारको राहत र उद्धारमा केही भए पनि सहयोग पुग्ने विश्वास छ,’ उनले भने।
नेपालगन्ज उपमहानगरपालिका–४ का पूर्ववडा अध्यक्ष तथा समाजसेवी सफिक बेहनाले १ लाख ५१ हजार रुपैयाँ र समाजसेवी राजा खानले १ लाख रुपैयाँ सहयोग गरेका छन्।
तीनै जनाबाट प्राप्त ४ लाख ६२ हजार रुपैयाँ बाँकेका प्रमुख जिल्ला अधिकारी दिलकुमार तामाङमार्फत प्रधानमन्त्री दैवी प्रकोप उद्धार कोषमा जम्मा गरिएको मुस्लिम अगुवा तथा समाजसेवी मेराज अहमद हिमालयले बताए। ‘विपद्का बेला पीडितको जात, धर्म र समुदाय हेरेर सहयोग गर्नु हुँदैन। यस्तो अवस्थामा मानवीय सहयोग नै महत्वपूर्ण हुन्छ,’ उनले भने, ‘धर्मभन्दा मानवता ठूलो हुन्छ।’
उनका अनुसार बाढीबाट प्रभावित परिवारको राहत तथा उद्धारमा सहयोग पुगोस् भनेर रकम संकलन गरी कोषमा जम्मा गरिएको हो। हिमालयले सहयोग गर्ने जसगढ, बेहना र खानलाई धन्यवाद दिए। विपद्को समयमा आफ्नो क्षमताअनुसार सहयोग गर्नु सामाजिक दायित्व भएको उनले बताए।
‘सहयोग सानो–ठूलो हुँदैन। विपत्तिमा परेका नागरिकको दुःखमा साथ दिन गरिएको हरेक प्रयास महत्वपूर्ण हुन्छ,’ उनले भने।
नेपालगन्जका मुस्लिम अगुवा तथा समाजसेवीले गरेको यो सहयोगलाई विपद्का बेला समुदायबीचको सहकार्यका रूपमा समेत हेरिएको छ। प्राकृतिक विपद्ले जात, धर्म वा समुदाय नछुट्याउने भएकाले प्रभावित नागरिकको उद्धार र राहतमा सबै पक्षको सहयोग आवश्यक हुने उनले बताए।
‘पीडित नेपाली नागरिक हुन्। उनीहरूको दुःखमा साथ दिनु हाम्रो दायित्व हो,’ उनले भने।
Discussion about this post