काठमाडौं मंसिर २८ गते ।
अध्यक्ष एवं प्रधानमन्त्रीबाट केपी शर्मा ओलीको माग र उनको स्पष्ट अवज्ञा कारण युद्धमय बनेको नेकपाको स्थायी कमिटी बैठक त्यही उन्मादका साथ आइतबार पार्टी मुख्यालय धुम्बाराहीमा बस्दै छ।
प्रधानमन्त्री ओलीको बैठकमा उपस्थिति या अनुपस्थितिबारे अड्कलबाजीहरु भइरहँदा उनले स्थायी कमिटी सदस्यहरुलाई अघिल्लो बैठकमा पत्र पठाए। उनले पत्रमार्फत स्थायी कमिटी सदस्यहरुको विवेकलाई गरेको सराहनालाई उनी आइतबारको बैठकमा उपस्थित हुने संकेतका रुपमा हेरिएको छ।
तर असन्तुष्ट पक्ष आक्रामक हुन सक्ने सम्भावना बढ्दै जाँदा पनि कमिटीमा अल्पमतमा रहेका प्रधानमन्त्री ओलीको उपस्थिति केवल सांकेतिक होला या अर्थपूर्ण बन्ला भन्ने अनिश्चित छ। स्थायी कमिटी बैठककै दिन पारेर आइतबार बिहान प्रधानमन्त्री ओलीले संवैधानिक परिषद्को बैठक बोलाएका थिए।
तर प्रतिपक्ष नेपाली कांग्रेसका सभापति शेरबहादुर देउवाले आफू सामेल नहुने बताएपछि प्रधानमन्त्री ओलीले संवैधानिक परिषद्को बैठक स्थगित गर्ने सम्भावना प्रवल बनेको छ। कांग्रेसले सरकारको कार्यशैलीविरुद्ध राष्ट्रव्यापी विरोध प्रर्दशनको घोषणा गरेका कारण संवैधानिक परिषद् बैठक सार्न पर्ने परिस्थिति निर्माण भएको छ।
प्रधानमन्त्री ओलीले आइतबारका लागि यो बाहेक अन्य कुनै कार्यक्रम घोषणा गरेका छैनन्। प्रधानमन्त्री ओली निकट स्थायी कमिटी सदस्य एवं परराष्ट्रमन्त्री प्रदीप ज्ञवालीले स्थायी कमिटी बैठकको एजेण्डा सहमतिमा निर्माण भइसकेको अवस्थामा प्रधानमन्त्री ओली उक्त बैठकमा सहभागी हुने बताएका छन्।
Discussion about this post