बाँके माघ १० गते ।
नेपालगन्जलाई प्लास्टिक मुक्त शहर बनाउने अभियान थालेको करिब दुई बर्ष हुन थालेको छ । तर, शहरमा अझै पनि यत्रतत्रै सर्वत्रै प्लास्टिकका झोला प्रयोगमा आइरहेका छन। यसको प्रयोगमा कमि आएको देखिदैन । शहरमा अझै पनि जताततै प्लाष्टिकका डङ्गुर देख्न सकिन्छ । उपमहानगरपालिका र यससँग समन्वय गरी छोटो समयमा अभियान्ता बन्ने होडबाजीमा रहेका केहीनीजि तथा साझेदारी संस्थाहरू समेत यतिबेला उक्त अभियानबाट भागेका छन ।
कतिपयले त प्लास्टिकका झोला व्यवस्थापनका लागि भन्दै कागत, कपडाका झोला बनाएका थिए । उद्योग नै सञ्चालन गरेको भन्दै यहाँका मेयर डाक्टर धवलशम्सेर राणाले उद्घाटन समेत नगरेका कहाँ हुन र ।
तर अहिले ती उद्योग र त्यहाँबाट उत्पादन भैरहेका कागतका झोला कपडाका झोला, दुना टपरी लगायतका प्लाष्टिक मुक्त सामाग्री कहाँ छन अत्तोपत्तो छैन । बजारभरी प्लास्टिटकको ओइरोल देखिने गरेको छ ।
राज्य, स्थानिय निकायले प्लास्टिकका झोला प्रयोगमा पुर्णतया बन्देज लगाउने र नियमन गर्न सके कागजका झोलाको माग बढ्ने संगै शहर सफा समेत हुने दाबी गर्दै हिडेका अभियान्ता यतिबेला भूमिगत झै छन ।
कागजका झोलाको खपत बढ्नु भनेको शहर सफा हुनु हो, त्यसैले यसको लागी नागरिक, स्थानियतह, ब्यापारी, ग्राहक सबैले मिलेर योगदान दिन जरुरी रहेको बताउँने उत्पादनकर्ताहरू समेत यतिबेला बजारमा आफनो कारोवार बढाउन सक्रिय भएको देखिदैन ।
उपमहानगरपालिकाको नेपालगन्ज प्लाष्टिक मुक्त घोषणा अभियान कागजमै सिमित रहेको छ । यस अभियानमा नेपालगन्ज वडाध्यक्ष, वडासचिव, सम्बद्ध सरकारी तथा गैरसकारी कार्यालयका प्रमुख एवं प्रतिनिधि सहभागी कार्यक्रममा अधिकांशले सहमत जनाएका थिए । तर, यी कसैले पनि आफैले गरेको सहमति अनुसार काम गर्न नसकेको यतिबेला बजारमा देखिने प्लाष्टिकका डङगुरले प्रष्ट पारेका छन ।
आर्थिक वर्ष २०७६÷०७७ को नीति तथा कार्यक्रममा नेपालगन्ज उपमहानगरपालिकाले ‘एक वर्षमै नगरलाई प्लास्टिक झोलामुक्त गरिने भनेको थियो । तर, अहिले करिब दुई बर्ष वित्न लागिसक्यो काम शून्य छ ।
नेपालगन्ज उपमहानगरपालिकाले मात्रै होइन यहाँका आठ वटै स्थानीय तहले वर्षेनी यस्ता घोषणा गरिरहेका हुन्छन् । कार्यान्वयनमा भने शून्य प्रगति छ ।
१८ चैत २०७१ को राजपत्रमा भनिएको छ, ‘नेपाल सरकारले संवत् २०७२ साल वैशाख १ गतेदेखि लागू हुने गरी २० इन्च चौडाइ र ३५ इन्च लम्बाइ साइज र ४० माइक्रोन मोटाइसम्मका प्लास्टिक झोलाको आयात, भण्डारण, बिक्री वितरण र प्रयोग गर्न प्रतिबन्ध लगाएको छ ।’ तर कार्यान्वयन हुन अहिले पनि सकेको देखिदैन ।
यस बिषयमा नेपालगन्ज उपमहानगरपालिकाको वातावरण शाखा अभियान चचलिरहेको बताउँदै प्रगती विवरण रेकर्ड नभएको बताउँछ । यसले पनि के पुष्टि हुन्छ भने उक्त अभियानका लागि शहरमा रेकर्ड राख्ने गरी कुनै काम वा प्रगती हुन सकेको छैन ।
Discussion about this post