बाँके फागुन ११ गते ।
बाँके प्रहरी प्रशासन निकम्वा हुँदा नेपालगन्जको जमुनाह नाका अस्तव्यस्त भएको छ । नाका सवारी साधन पार्किङ स्थल बन्दा नाकामा सुरक्षा चुनौति समेत बढेको छ । बाँकेका सिडियो रामबहादुर कुरुम्वांग र एसपी ओम बहादुर रानाले नाका व्यवस्थापनमा कुनै चासो लिएका छैनन् । फोरलेन सडकको बीचमा मोटरसाईकल पार्किङ गर्ने र सयौं रिक्साको भिडले नाका अस्तव्यस्त बन्ने गरेको हो ।
भारतीय सुरक्षाकर्मीहरुले नेपालीहरुलाई भारत प्रवेश गर्न दिने तर सवारी साधन लैजान नदिएका कारण भिडभाड बढी हुने गरेको छ । तर भारतबाट दैनिक सयौं मालबाहक ट्रकहरु नेपाल भित्रिने गरेको छ । भन्सार गराउनका लागि सयौं मालबाहक ट्रकहरु फोरलेन सडकमै पार्किङ गरेको देख्न सकिन्छ । रिक्सा, मोटरसाईकललगायतका सवारी साधनका कारण सर्वसाधारणहरुलाई आउजाउमा समेत समस्या हुने गरेको छ ।
भारतबाट आउने सर्वसाधारणहरुलाई बोक्न सयौँ रिक्सा चालकहरु सीमा पुग्ने गरेका छन् । नेपाल—भारत सीमा जमुनाहास्थित ईलाका प्रहरी कार्यालयका प्रमुख प्रहरी सहायक निरीक्षक विष्णु गिरीले भारतीय सुरक्षाकर्मीले नेपाली प्लेटका सवारी साधनहरु प्रवेश गर्न नदिएका कारण सीमा अस्तव्यस्त देखिएको बताए ।
‘सीमावर्ती भारतीय बजार रुपैडिहामा किनमेलका लागि हजारौं नेपालीहरु आउँछन् । सवारी साधन भारत छिर्न नदिइएपछि सीमाकै सडकमा राख्नु पर्ने बाध्यता छ,’ उनले भने,‘त्यसैले नाका अस्तव्यस्त देखिएको हो । व्यवस्थापनको प्रयास भइरहेको छ ।’ उनका अनुसार ट्राफिक प्रहरीको सहयोगमा पार्किङस्थल बनाउने प्रयास भइरहेको छ ।
‘सस्तोमा पार्किङ गर्ने स्थान खोजेका थियौँ । तर सवारी चालकले मान्दैनन् । सडकमै निशुल्क पार्किङ गर्न खोजिएकाले हामीलाई समस्या भएको हो,’ उनले भने । दुई देशको नाका सुन्दर देखिनु पर्ने हो तर भिडभाडले कुरुपजस्तै देखिन्छ ।’ सरकारले नेपाल—भारत सीमा खोल्ने निर्णय गरेको खबर सार्वजनिक भएपछि नेपालगन्जको जमुनाहामा भारत जानेहरुको भिडभाड बढेको छ ।
भिडलाई नियन्त्रण गर्न सुरक्षाकर्मीहरुलाई हम्मे हुने गरेको हो । सवारी साधन लिएर नेपाल भारत आउजाउ गर्न खोज्ने सर्वसाधारणहरुलाई प्रहरीले रोक्न खोज्दा विवाद पनि हुने गरेको छ । नाका खुलिसकेको जानकारी पाएका सर्वसाधारणहरुले सुरक्षाकर्मीहरुसंग विवाद गर्न थालेका हुन । दैनिक उपभोग्य सामाग्री किन्न हजारौ नेपाली रुपैडिहा बजार पुग्ने गरेका हुन । उनीहरु मोटरसाईकल, रिक्सा, नगरबसमा पुग्ने गर्छन ।
त्यस्तै सयौं नेपालीहरु कामको खोजिमा नेपालगन्ज नाका भएर भारत पस्ने गरेका छन् । ‘रिक्सा, मोटरसाईकल, बस, ट्रकको भिडले पैदल हिड्नसमेत सक्ने अवस्था छैन । फोरलेन सडक हो कि पार्किङ गर्ने ठाउँ हो,’ जमुनाहाका स्थानीय मोहम्द शेर अली भन्छन्,‘दुई देशको नाका सुन्दर देखिनु पर्ने हो तर भिडभाडले कुरुपजस्तै देखिन्छ ।’ सडक छेउछाउमा माछा मासुको पसल राखिएका छन् । जस्का कारण फोहोर तथा दुर्गन्धित बनेको छ ।
स्थानीय प्रशासनले सीमा व्यवस्थापनका लागि पटकपटक प्रयास गर्दै आएको छ । तर उक्त प्रयास भने सफल हुन सकेको छैन । सरकारले नाका खुलेको भने पनि ईलाका प्रहरी कार्यालयका प्रमुख प्रहरी सहायक निरीक्षक गिरीले नाका खोल्ने बारे स्थानीय प्रशासनबाट निर्देश नआएको जनाए । उनले निर्देशनपछि मात्रै सवारी साधनहरु भारत जान दिने बताए ।
‘मान्छेहरुलाई जान दिएका छौँ । तर मोटरसाईकल र रिक्सासमेत भारत जान दिएका छैनौ,’ उनले भने,‘पैदल आउजाउ भइरहेको छ ।’ देशका अन्य नाकामा निर्वाध सवारीसाधन आउजाउ भइरहेका छन् । तर जमुनाह नाकामा भने नेपालीहरुलाई भारत प्रवेशमा नेपाली सुरक्षा अधिकारीहरुले नै अघोषित रोक लगाएका छन् । बाँकेका सिडियो र एसपीका कारण किनमेलका लागि सर्वसाधरणहरु पैदल हिडेर जान बाध्य भएका छन् ।
भारतीय गाडीहरुलाई निर्वाध नेपाल आउन दिने बाँके प्रहरी प्रशासनले नेपालीहरुलाई सवारीसाधन लिएर रुपैडिया जान आफै रोक लगाएको छ । कि नाका पूर्णरुपमा बन्द गर्नु पर्यो कि पुरै खोल्नु पर्यो बाँके प्रहरी प्रशासनले के तमासा देखाएको ? पावर हुनेहरु गाडीमा नाका वारपार गरिरहेका छन् पावर नहुने सर्वसाधरणहरुले कष्ट झेलिरहेका छन् नाकामा भेटिएका सर्वसाधरणहरु बताउँदै थिए ।
नाकामा नेपालीहरुले पाउने दुख कष्टबारे यहाँका ठूला राजनीतिक दलहरुले चुइक्क समेत बोलेका छैनन् । केही मधेश केन्द्रीत दलहरुले नाकालाई सहज बनाउन आन्दोलन नै गरेपनि नेपाली काँग्रेस, नेकपा, राप्रपालगायतका दलहरु पनि मौन छन् ।
राजनीतिक दलहरु मौन हुँदा सिडियो र एसपीले समेत नाका व्यवस्थापनका सवालमा कुनै ठोस योजना ल्याउन सकेका छैनन् । जस्का कारण पहुँच नभएका नागरिकहरुले नाकामा ठूलो सास्ती खेप्न बाध्य भएका छन् ।
Discussion about this post