खोजखबर संवाददाता
बाँके असार १० गते । नेपालगन्ज उपमहानगरपालिकाको पाँचौ नगरसभा आज सम्पन्न भएकाे छ ।
नगरसभामा नगर उप–प्रमुख उमा थापामगरले आ.व २०७६÷०७७ का लागि रु २ अरव २८ करोड ८५ लाख ५४ हजारको बजेट प्रस्ताव गर्नुभएको छ । भेरी प्राविधिक शिक्षालयमा भएको नगर सभामा नगर उप–प्रमुख थापाले प्रस्तुत गर्नुभएको प्रस्तावित बजेटमा चालु खर्चतर्फ रु १ अर्व २१ करोड ४७ लाख, पूँजीगत तर्फ रु १ अर्व ४ करोड ३७ लाख, वित्तिय व्यवस्थापनका लागि रु रु ३ करोड प्रस्ताव गरिएको छ ।
यस्तै नेपालगन्ज उपमहानगरपालिकाका मेयर डा. धवल शम्सेर राणाले नितितथा कार्यक्रम प्रस्तुत गर्नु भएको छ । नगरसभामा नीति तथा कार्यक्रम प्रस्तुत गर्दै मेयर राणाले ‘स्मार्ट’ नेपालगन्ज बनाउन सहकार्यमा जोड दिनुभयो । मेयर राणाले प्रस्तुत गर्नुभएको नीति तथा कार्यक्रममा बागेश्वरी मन्दिर नजिक सात तले बागेश्वरी कम्पलेक्सदेखि हालको नगरभवनमा बहुतले पार्किङ्ग सहित सपिङ्ग कम्पलेक्स बनाउने बिषयलाई प्राथमिकता दिईएको छ ।
वडा नम्बर १४ मा सात सय क्षमताको निर्माणधिन सभाहल बनाएपछि नगरभवनमा ‘हाई राईज पार्किङ्ग’ सुविधा सहितको सपिङ्ग कम्पलेक्स बनाउने बताईएकाे छ । यस्तै डिपिआर निर्माणको क्रममा रहेको बागेश्वरी कम्पलेक्स तीन वर्ष भित्र बनाइसक्ने लक्ष्य निर्धारण गरिएको छ ।
हाल बनेको बसपार्क एक महिनाभित्र सन्चालन गर्ने तयारी भएको छ । फुटपाथको उचित व्यवस्थापन गरिने बिषयलाई प्राथमिकताका सथा उठान गरिएको छ । नीति तथा कार्यक्रममा नेपालगन्जलाई आर्थिक तथा पर्यटन प्रर्वद्धन गर्नका लागि नगरक्षेत्र भित्र क्यासिनो स्थापना तथा सन्चालनमा प्रोत्साहन गर्ने बिषयलाई प्राथमिकताका साथ उठान गरिएको छ ।
Discussion about this post