बाँके चैत १२ गते ।
नेपालगञ्ज उपमहानगरपालिका वडा नम्बर ५ का वडाध्यक्ष कैफुलवरा जोलाहमाथि बिहीबार कार्यकक्षमै कुटपिट गरिएको छ । नेता सराफत हल्वाईको नेतृत्वमा गएको समूहले वडाध्यक्ष जोलाहमाथि कुटपिट गरेको हो ।
वडाध्यक्ष जोलाहमाथि कुटपिट गर्नुका साथै कार्यालयमा तोडफोडसमेत गरिएको स्थानीयहरु बताउँछन् । आक्रमणबाट अध्यक्ष जोलाहको टाउको, घाँटी, पिठ्युलगायतमा चोट लागेको छ । जोलाहले वडा कार्यालयमा सेवाग्राहीको काम गरिरहेका बेला हल्वाईको नेतृत्वमा आएको २/३ जनाको समूहले एकाएक आक्रमण गरेको स्थानीयहरु बताउँछन् ।
वडा अध्यक्ष जोलाहमाथी कुटपिट गर्ने स्थानीय सराफत हल्वाईलाई वडा प्रहरी कार्यालय बाँकेको टोलीले पक्राउ गरेको छ । हल्वाईका छोरा मो.अर्षद हल्वाई फरार रहेको प्रहरीले जनाएको छ ।
वडा अध्यक्ष जोलाहलाई हेल्मेटले कुटपिट गरेर फरार रहेका हल्वाईको खोजी कार्य भइरहेको वडा प्रहरी कार्यालयका इन्चार्ज डिल्ली बहादुर खडकाले जानकारी दिनुभयो ।
टाउको, घाँटी, पिठ्युलगायतमा चोट लागेका जोलाहको शिक्षण अस्पताल नेपालगञ्जमा उपचार भईरहेको छ । वडा कार्यालयका कर्मचारी राज सिंह सिँजापति सहितका कर्मचारीहरुमाथी समेत अभद्र व्यवहार गरिएको उपमहानगरपालिकाले जनाएको छ ।
Discussion about this post