बाँके साउन ८ गते ।
नेपालगन्ज उपमहानगरपालिका–६ फुलटेक्रास्थित वसपार्कदेखि फुलटेक्रा चोक निस्कने रोडमा बनेको नालाप्रति स्थानीयबासी रुष्ट भएका छन् । नाला निर्माणका लागि स्थानीयबासी चन्द्रेश्वर त्रिपाठी अध्यक्ष रहेको उपभोक्ता समितिले वडा कार्यालयको १८ लाख ४४ हजारबढीको बजेटबाट नाला निर्माण गरेको थियो ।
सडकको दायाँवायाँ ६ मिटर कायम गरेर बनाइएको उक्त नाला घरभन्दा उचो बनाइएपछि घरभित्र पानी पस्ने भएकाले स्थानीयबासी तनावमा परेका हुन् ।
यहाँसम्मकी केही स्थानीयले घर नभत्काउँदा नाला निर्माण नै मापदण्ड विपरीत भएको छ । केही स्थानीयबासी भन्छन्–‘नाला निर्माणकै जिम्मेवार व्यक्तिहरुले समेत आफ्नो फाइदाका लागि नालालाई बङ्ग्याइटङ्ग्याइ गरिएको छ, यो कसरी भयो ?’ पहिले ८ मिटर कायम गरेर नाला निर्माणको सहमति भएको थियो ।
त्यसबाट स्थानीयका संरचना धेरै भत्काउनु पर्ने अवस्था आएपछि ६ मिटर कायम गर्ने सहमति भएको थियो । त्यही अनुसार विद्यालय समेत भत्काइएको थियो ।
तर ६ मिटरभित्र पर्ने केही घरधनीले घर नभत्काएर बाटोलाई साघुरो बनाएका छन् । त्यसमा नाला निर्माण उपभोक्ता समितिकै पदाधिकारी समेत रहेका स्थानीय बताउँछन् । सडकमाथिबाटै नाला बसाईदिएको स्थानीयबासी बताउँछन् ।
त्रिपाठी अध्यक्ष रहेको उपभोक्ता समितिले आयोजनाको वोर्डमा समेत झ्याली गरेको छ । लागत खर्च १८ लाख ४४ हजार भनिएपनि योजना कहिलेसम्म सक्ने ? कहाँ देखि कहाँसम्म निर्माण गर्ने ? कति मिटर नाला बनाउनुपर्ने ? लगायतका जानकारी वोर्डमा उल्लेख गरिएको छैन् ।
स्थानीयबासी विक्रान्त श्रीवास्तवले मापदण्ड विपरीतको नालाले सडकदेखि घर डुवानको उच्च जोखिममा परेको बताए । उनले भने–‘विल फस्र्यौट गर्न हतारहतारमा नाला निर्माण गरिएको बताए ।
नाला निर्माणमा उपभोक्ता समितिदेखि, इन्जिनियर र वडा कार्यालयको मिलेमत्तोमा मापदण्ड विपरीत काम भएको उनले बताए । उनले नाला निर्माणबारे छानवीन गर्न माग गरे । ‘माग सम्वोधन भएन भने उपमहानगरपालिका र जिल्ला प्रशासन कार्यालयमा उजुरी गर्छु उनले अनलाइन खोजखवरलाई भने–‘त्यहाँपनि सुनुवाई नभए अदालतमा मुद्दा हाल्छु ।’
श्रीवास्तव मात्र होइन अर्की स्थानीय ऋतु सिंह पनि नाला निर्माण प्रति रुष्ट छिन् । सडक फराकिलो नगरेर नाला निर्माण गरिएको भन्दै सिंहले आपत्ती जनाइन् । ‘कतै ६ मिटर कायम गर्ने कतै ५ मिटर कायम गर्ने यो सहमति अनुसार भएन’–उनले भनिन् । उनले वडाअध्यक्षको गैरजिम्मेवारका कारण सडक र नाला निर्माणमा समस्या देखिएको बताइन् ।
उपभोक्ता समितिका अध्यक्ष त्रिपाठीले भने सरकारी मापदण्ड अनुसार नै नाला उचो बनाइएको दावी गरे । उनले कतै पाँच मिटर कायम गरेर नाला निर्माण गरेको बिषयमा वडा कार्यालयको अनुमति र स्थानीयको छलफलपछि गरिएको बताए ।
उनले ५ सय ६८ मिटर लामो नाला निर्माण गरिएको दावी गरे । उनका अनुसार १७ लाखबढीमा नाला निर्माण गरिएको पनि बताए ।
वडाअध्यक्ष समिर प्रताप सिंहले भने बाटो निर्माणका क्रममा नाला अग्लो हुनु स्वभाविक भएको बताए । उनले नाला निर्माण ६ मिटर कायम गरेर गर्नुपर्ने सहमति भएपनि स्थानीयबासीकै सहमतिमा कतै पाँच कतै साढे पाँच मिटर नाला निर्माण गरिएको दावी गरे ।
Discussion about this post