बाँके असोज १६ गते ।
बाँकेको जानकी गाउँपालिका वडा नम्बर २ बेलभारका वडाअध्यक्ष चन्द्रिका प्रसाद गुप्ताले फरक पार्टीमा आस्था राखेकै कारण सिफारिसबाट बञ्चिन गर्ने गरेको सेवाग्राहीले गुनासो सुनाएका छन् ।
जानकी गाउँपालिका वडा नम्बर २ बेलभारस्थित शिवशक्ती कृषक समुहका अध्यक्ष पवनकुमार विश्वकर्माले वडाअध्यक्षबाट सिफारिस नपाएको भन्दै आक्रोसित भएका छन । उनी चार पटक वडा कार्यालयमा पुगिसके ।
६ दिन देखि कार्यालयमा पुग्दा कहिले वडाअध्यक्ष नभेटिने र कहिले फरक पार्टीको मान्छे भन्दै इन्कार गर्ने गरेका छन् । ‘कृषक समुहलाई प्रधानमन्त्री कृषि आधुनिकीकरण योजनामा सुचिकृत गर्नको लागि मैले उहाँ वडाध्यक्ष) सँग सिफारिस लिन गए, उहाँले त विपक्षी होस्, मलाई भोट पनि दिएनस् भन्दै सिफारिस दिन मान्नु भएन,’ उनले भने ।
आफुले वडाअध्यक्ष भन्दा फरक पार्टीमा आस्था राखेकै कारण सिफारिस नपाएको विश्वकर्माको भनाइ छ । कृषक समुहको अध्यक्ष पद छाडेर अर्को ब्यक्तिलाई जिम्मा दिएपछि मात्र आफुले सिफारिस दिने वडाअध्यक्ष गुप्ताले बताएको विश्वकर्माले सुनाए ।
वडाअध्यक्षले विकासमा समेत विभेद गर्ने गरेका बताए । यस्तै स्थानीय श्याम मुरा कोभिड संक्रमित भए । उनले कोरोना वीमाका लागि वडा कार्यालयमा सिफारिस लिन आए । तर तीन महिनादेखि वडाअध्यक्षले सिफारिस दिएका छैनन् । उनले फरक पार्टी भएकै कारण सेवाबाट बञ्चित हुनु परेको बताए ।
वडा कार्यालयले सिफारिस नदिएको विरुद्ध आफु जिल्ला प्रशासन, अख्तियार दुरुपयोग अनुसन्धान आयोग, अदालत लगायत निकायमा जाने उनले बताएका छन् ।
स्थानीय सरकार कार्यसञ्चालन ऐन, २०७४ ले सबैभन्दा तल्लो तहमा रहेको वडापालिकालाई धेरै अधिकार दिएको छ । वडाअध्यक्षले वडा तहमा बसेर जनतालाई आवश्यक पर्ने सिफारिस गर्नुपर्छ । ऐन अनुसार त्यस्तो सिफारिस गर्दा वडाअध्यक्षले कसैलाई पनि भेदभाव गर्न पाईदैन ।
तर, वडाअध्यक्ष गुप्ताले फरक पार्टीमा आस्था राखेकै कारण सिफारिस नदिएको गम्भिर आरोप लागेको छ । जानकी गाउँपालिका वडा नम्बर २ की स्थानीय हेमलता थापाले पनि वडाअध्यक्ष गुप्ताले आफ्नो मान्छेलाई मात्र सिफारिस दिने गरेको गुनासो गरिन् ।
‘अरुलाई सिफारिस नदिने, आफ्नो पार्टीकालाई मात्र सहयोग गर्ने गर्नु हुन्छ, सिफारिस माग्दा उहाँ तपाईले मलाई भोट दिएको हो र भनेर भन्नुहुन्छ,’ उनले भनिन् ।
वडाअध्यक्ष गुप्ताले आफुहरुको समुहको सिफारिस रोकेर उनका सहोदर भाई सन्तराम गुप्ताले नेतृत्व गरेको सहकारीलाई भने सुचीकृतका लागि सिफारिस दिइसकेको विश्वकर्माको भनाई छ ।
यस विषयमा प्रतिक्रिया लिदाँ वडाअध्यक्ष चन्द्रिकाप्रसाद गुप्ताले भने आइतवारमात्रै प्रतिक्रिया दिने बताए । म आज नेपालगन्जमा छु, आइतवार आउनु होला अनलाइन खोजखवरसँग उनले भने ।
स्थानीयबासीले वडाअध्यक्षले राजनीतिक आस्थाका आधारमा विभेद गर्ने गरेको बताएका छन् । उनी माओवादी केन्द्रबाट निर्वाचित भएका थिए ।
यो वडामा प्यानलनै जितेको थियो । त्यही भएर वडासदस्यहरु चुप लागेर बस्ने गर्छन् । माओवादी कार्यकर्ताहरुको काम भने उनले फटाफट गर्ने गरेको स्थानीयको भनाइ छ ।
स्थानीयबासीले प्रहरी प्रशासन पनि वडाअध्यक्षको प्रलोभनमा परेको आरोप लगाएका छन् । स्थानीयले प्रहरी प्रशासनले स्थानीयको कुरा नसुनेर वडाअध्यक्षकै कुरा सुन्ने गरेका कारण वडाअध्यक्षको मनोमानी बढेको बताए ।
Discussion about this post