बाँके, मंसिर ६ गते ।
बाँकेको खजुरा गाउँपालिकाले नेपालगन्ज–गुलरिया हुलाकी सडकअन्तर्गत खजुरा बजारदेखि इलाका प्रहरी कार्यालय धनौलीसम्म सडक सीमाभित्र रहेका घरटहरा तथा अन्य संरचना हटाउन १५ दिनको अल्टिमेटम दिएको छ ।
गाउँपालिकाले सार्वजनिक सूचना जारी गर्दै सडक सीमाभित्र रहेका घरटहरा, पसल, पर्खाल, अस्थायी संरचना तथा अन्य अवरोध हटाएर सडक सीमा खाली गर्न सम्बन्धित व्यक्ति तथा संस्थालाई आग्रह गरेको हो ।
हुलाकी राजमार्गअन्तर्गत उक्त सडक खण्डमा दायाँबायाँ १५–१५ मिटर सडक सीमा कायम गरी मापदण्डअनुसार फुटपाथ विस्तार गर्नुपर्ने भएकाले संरचना हटाउन सूचना जारी गरिएको गाउँपालिकाले जनाएको छ ।
गाउँपालिकाका अध्यक्ष डम्बरबहादुर विकले सूचना प्रकाशित भएको मितिले १५ दिनभित्र सडक सीमाभित्र रहेका संरचना सम्बन्धित व्यक्ति तथा संस्थाले आफैँ हटाउनुपर्ने बताए । तोकिएको समयभित्र अतिक्रमित संरचना तथा अवरोध नहटाए प्रचलित कानुनअनुसार सम्बन्धित निकायसँग समन्वय गरी गाउँपालिकाले हटाउने उनले बताए ।
संरचना हटाउँदा लाग्ने खर्च तथा त्यसबाट उत्पन्न हुने दायित्व सम्बन्धित व्यक्ति, संस्था वा संरचना धनीबाट असुलउपर गरिने सूचनामा उल्लेख छ ।
गाउँपालिकाका प्रमुख प्रशासकीय अधिकृत दिलबहादुर पौडेलले सडक सार्वजनिक सम्पत्ति भएकाले यसको संरक्षण, विकास तथा सौन्दर्यीकरणमा सबैको सहयोग आवश्यक रहेको बताए । उनले तोकिएको समयभित्र सडक क्षेत्रमा रहेका संरचना हटाउन सम्बन्धित सबैलाई आग्रह गरे ।
यता, हुलाकी राजमार्ग निर्देशनालय, योजना कार्यालय नेपालगन्जले सडक सीमा खाली भएपछि फुटपाथ निर्माण गर्ने जनाएको छ ।
योजना कार्यालयका प्रमुख लीलाबहादुर भण्डारीले खाली गरिएको क्षेत्रमा टायल बिछ्याएर आकर्षक फुटपाथ निर्माण गर्ने योजना रहेको बताए । फुटपाथ निर्माणले खजुरा बजारलाई सुन्दर बनाउनुका साथै बजार क्षेत्र व्यवस्थित र फराकिलो बनाउन सहयोग पुग्ने उनले बताए ।











Discussion about this post