बाँके जेठ २९ गते ।
नेपाली कांग्रेस बाँकेको कार्यालयमा लगाइएको ताला खुलेको छ । कांग्रेसको असन्तुष्ट पक्षले केहीदिन अघि विभिन्न माग राख्दै तालाबन्दी गरेको थियो ।
कांग्रेस केन्द्रीय सदस्य मैकुलाल बाल्मिकीको उपस्थितीमा हिंजो बसेको बैठकमा भएको सहमती बमोजिम आज ताला खोलिएको हो । कांग्रेस बाँकेका सचिव सुधान्सु कोइरालाले पार्टी कार्यालयको ताला खुलेको जानकारी दिनुभयो ।
असन्तुष्ट पक्षका तर्फबाट कांगे्रेसका महासमिति सदस्य बादशाह कुर्मी, महाधिवेशन प्रतिनिधी सुदिपनरसिंह राणा, जिल्ला सदस्य अशोक श्रेष्ठ र भिमबहादुर बिकले कार्यालयमा आफै पुगेर ताला खोल्नुभएको हो ।
तालाबन्दीका विषयमा असन्तुष्ट पक्षले बुझाएको ध्यानाकर्षण पत्रमा उल्लेख गरिएका विषयहरु नेपाली कांग्रेस केन्द्रीय कार्यालयमा विचाराधिन रहेको र यस विषयमा केन्द्रले गर्ने निर्णयमा दुबै पक्ष यसअघि सहमत भएका थिए ।
आगामी दिनमा पार्टीलाई विधि विधान र पद्धति बमोजिम सबैको सम्मान हुने गरी सञ्चालन गर्ने गरी दुबै पक्ष सहमत पनि भएका छन् । यसबारे दुबै पक्षले केन्द्रमा आवश्यक पहल गर्ने पनि निर्णय भएको छ ।
Discussion about this post