बाँके साउन १२ गते ।
विगत लामो समयदेखि चल्दै आएको आर्थिक वर्षको अन्तिम महिनामा हतारमा विभिन्न काम गरेको जस्तो देखाएर ठूलो रकम खर्च गर्ने प्रवृत्ति यस पटक पनि बाँकेमा दोहोरिएको छ ।
आर्थिक वर्षको अन्त्यमा विकास निर्माणको कामले गति पाउने र बढी खर्च हुने पुरानो प्रवृत्ति बाँकेमा भर्खरै सम्पन्न भएको आर्थिक वर्ष २०७८/०७९ मा पनि दोहोरिएको पाइएको हो ।
कोष तथा लेखा नियन्त्रक कार्यालय बाँकेको तथ्याङ्कअनुसार संघ र प्रदेशको पुँजीगत (विकास) खर्च असारमा मात्रै ३ अर्बभन्दा बढी भएको पाइएको छ ।
असारमा संघतर्फ २ अर्ब ६१ करोड ७६ लाख रुपैयाँ र प्रदेशतर्फ ७१ करोड ४० लाख ७२ हजार रुपियाँ बाँकेमा खर्च भएको देखिएको छ । संघ र प्रदेश तर्फको बजेटबाट असार महिनामा मात्र भएको खर्च कुल ३ अर्ब ३३ करोड १६ लाख ८४ हजार ८१४ रुपैयाँ छ ।
असारे विकासलाई नियन्त्रण गर्न यस पटक बाँकेमा प्रयास गरिएको जिल्ला प्रशासन कार्यालय बाँकेले जनाएको छ । बाँकेका प्रमुख जिल्ला अधिकारी सूर्यबहादुर खत्रीले बजेट सकाउन र काम गरेको देखाउन असारमा हतारमा योजना पूरा गर्ने प्रवृत्तिलाई यस पटक निगरानी गरिएको बताउनुभयो ।
निगरानी गरिए पनि तीन अर्ब भन्दा बढी बजेट खर्च भएको देखिएकाले सो रकम कहाँ कहाँ खर्च भएको हो त्यसबारे पनि छानविन गरिने उहाँले बताउनुभयो ।
Discussion about this post