बाँके, कात्तिक २४ गते ।
पश्चिम राप्ती नदीमा हालसम्म ४८ किलोमिटर तटबन्ध निर्माण भएको छ । तटबन्ध निर्माणपछि नदी किनारको एक हजार ४४० हेक्टर खेतीयोग्य जमिन उकास तथा संरक्षण भएको छ ।
सिँचाइ तथा जलस्रोत व्यवस्थापन आयोजना लमही दाङका सूचना अधिकारी खुमानन्द वलीले दाङ र प्युठानको दोभानदेखि बाँकेको भारतीय सिमानासम्म फैलिएको पश्चिम राप्ती नदीमा हालसम्म ४८ किलोमिटर तटबन्ध निर्माण भएको बताए । उनका अनुसार पश्चिम राप्ती नदीको कुल लम्बाइ १५७.६ किलोमिटर छ ।
गत आर्थिक वर्षमा मात्रै पश्चिम राप्तीमा ५.६१ किलोमिटर तटबन्ध निर्माण भएको छ । त्यसबाट १६८ हेक्टर खेतीयोग्य जमिन उकास भएको वलीले बताए ।
नदी नियन्त्रणका लागि गढवा गाउँपालिका–६ जेठानगाउँमा ४३ लाख २३ हजार ५५५ रुपैयाँ र गढवा–३ स्थित उल्टिसोटा खोलामा १२ लाख ८८ हजार २८७ रुपैयाँ बराबरको आपत्कालीन नदी नियन्त्रणको काम सम्पन्न भएको छ । त्यसैगरी प्रगन्ना सिँचाइअन्तर्गत राप्ती नदीको दायाँ किनारका विभिन्न खण्ड तथा रनियापुर–छिङ्गतपुर क्षेत्रमा पनि करोडौँ रुपैयाँका तटबन्ध निर्माणका ठेक्का सम्पन्न भएका छन् ।
आयोजनाका अनुसार पश्चिम राप्ती नदीको दाङ र बाँके खण्डमा हालसम्म एक अर्ब २२ करोड १० लाख ५१ हजार रुपैयाँ बराबरका ठेक्का सम्पन्न भइसकेका छन् ।
लमही नगरपालिका–५ सोनारपुर खण्डमा १० करोड ११ लाख ६६ हजार ९६४ रुपैयाँको ठेक्कामा ७० प्रतिशत भौतिक प्रगति भएको छ । त्यस्तै गढवा गाउँपालिका–१ अडेहरीदेखि जेठानगाउँसम्मको खण्डमा पाँच करोड ३२ लाख ३८ हजार रुपैयाँको ठेक्कामा ४८.७० प्रतिशत काम सम्पन्न भएको छ ।
बाँकेको राप्ती सोनारी गाउँपालिका–७ खुल्ला झगडियामा चार करोड १५ लाख २५ हजार रुपैयाँको ठेक्कामा ७० प्रतिशत र राप्ती सोनारी–६ ढलैयामा ८२ लाख ४२ हजार ९२ रुपैयाँको ठेक्कामा ७५ प्रतिशत भौतिक प्रगति भएको आयोजनाले जनाएको छ ।
राप्ती नदीको बाढीबाट खेतीयोग्य जमिन र मानव बस्तीलाई जोगाउने उद्देश्यले मुख्य इन्टेक भालुवाङदेखि सक्लाहीसम्म १५.९९६ किलोमिटर तटबन्ध निर्माण सम्पन्न भएको छ । उक्त क्षेत्रमा भविष्यमा कुल २३ किलोमिटर तटबन्ध निर्माण गर्ने लक्ष्य राखिएको छ ।
पश्चिम राप्ती नदीमा बर्सेनि आउने बाढीका कारण नदी आसपासका बस्ती र खेतीयोग्य जमिन जोखिममा पर्दै आएका छन् । तटबन्ध निर्माणले बाढीको जोखिम न्यूनीकरणसँगै कृषि भूमि संरक्षणमा सहयोग पुग्ने अपेक्षा गरिएको छ ।
Discussion about this post