काठमाडौं साउन १६ गते ।
सरकारले प्लास्टिकका फूलमालामा प्रतिबन्ध लगाएको छ। वन तथा वातावरण मन्त्रालयले प्लास्टिकजन्य पुष्प गुच्छा, मालालगायतका सामग्री आयात, उत्पादन, बिक्रीवितरण तथा भण्डारणमा रोक लगाएको हो।
यसअघि ४० माइक्रोनभन्दा पातला प्लास्टिकका झोला उत्पादन, आयात, बिक्री र प्रयोगमा रोक लगाएको सरकारले थप अर्काे निर्णय गरेको हो। योसँगै अब मुलुकभर प्लास्टिकजन्य फूलगुच्छाको उत्पादन, आयात, बिक्री वितरण वा भण्डारणमा पूर्ण रूपमा रोक लागेको छ।
वन तथा वातावरणमन्त्री प्रदीप यादवले वातावरण प्रदूषण कम गर्नेदेखि लिएर मानवीय स्वास्थ्यलाई मध्यनजर गर्दै गरेको प्रस्तावमा वातावरण विभागले प्लास्टिकजन्य सामग्री आयातमा रोक लगाउने निर्णय गरेको बताएका छन्।
प्लास्टिकका फूलगुच्छा उत्पादन र प्रयोग भएको पाइएमा वातावरण संरक्षण ऐनअनुसार कारबाही गरिने समेत उनले जानकारी दिएका हुन्।
वातावरण संरक्षण ऐन ०७६ को दफा १५ (६) मा वातावरणमा उल्लेखनीय प्रतिकूल प्रभाव पार्ने पदार्थ, इन्धन, औजार वा उपकरणको उत्पादन, आयात, बिक्री–वितरण वा भण्डारणमा रोक लगाउन सकिने व्यवस्था छ। सोहीअनुसार वन तथा वातावरण मन्त्रालयले १२ साउनमा राजपत्रमा सूचना प्रकाशित गरेर फूलगुच्छामा प्रतिबन्ध लगाएको हो।
बजारमा प्लास्टिकका फूलगुच्छा प्रतिबन्ध लगाउनाले देशमा उत्पादन भएका प्राकृतिक फूलले बजार पाउनेमा नेपालका पुष्प व्यावसायीहरू उत्साहित छन्।
Discussion about this post