खोजखबर संवाददाता
बर्दिया असार १३ गते। बढैयाताल गाउँपालिकाले नागरिक समाजसंग समन्वय र सहकार्य गरि अघि बढ्नु पर्नेमा एक कार्यक्रमको सहभागीहरुले जोड दिएका छन् । नागरिक समाज, सञ्चार जगत, जनप्रतिनिधि सेवाप्रदायकसंगै सरोकारवाला बीचको छलफलबाट एकअर्कालाइ नजिक ल्याउने पारस्परिक समझदारी बढाउने स्थानीय सरकारलाई जनउत्तरदायी र पारदर्शी बनाई सुशासन कायम गर्ने उदेश्यका साथ गठन भएको साझेदारी मञ्चकोे बैठक बढैयाताल गाउँपालिकामा सम्पन्न भएको छ ।
साझेदारी मंचको बैठकमा स्थानीय सभाले गाँउ, समुदायमा रहेको समस्याहरुमा छलफल गर्ने र त्यहाँ समाधान हुन नसकेका सवालहरु गाँउपालिकामा गठन भएको साझेदारी मन्चमा ल्याएर छलफल गर्ने र समाधान गर्ने गर्दछ ।
पारस्परिक जवाफदेहिता परियोजना अन्तर्गतको जिल्ला साझेदार संस्था सूचना र मानव अधिकार अनुसन्धान केन्द्रले आयोजना गरेको हो । सो बैठकमा बढैयाताल उद्योग बाणिज्य संघ अध्यक्ष तथा नागरिक समाज सन्जालका अध्यक्ष बाल कृष्ण लामिछानेले, वडा न.ं१ का वडा अध्यक्ष शेर बहादुर थापा मगर, वडा नं. ३ का वडा अध्यक्ष दुर्गा प्रसाद पराजुली, नागरिक समाजका प्रतिनिधि, आमसञ्चार माध्यमका प्रतिनिधि र आमनागरिकहरुको समेत सहभागिता रहेको थियो ।
बैठकको सुरुवातमा पारस्परिक जवाफदेहिता परियोजना जिल्ला जवाफदेहिता अधिकृत सोम गुरुङले स्थानीय सभाका सदस्य र रेडियो श्रोता समूहका सदस्यहरुले निर्माण गरेका शिक्षा, स्वास्थ्य, कृषि र विपत व्यवस्थापनका सवालमा टिपोट गरिएका बुदाँहरु साथै संस्थाले उठान गरेका सवाल बारे जानकारी गराउनु भएको थियो ।
बढैयाताल गाउँपालिका वडा नं.३ मा गठित स्थानीय सभाका संयोजक हरि बहादुर घर्तीले आँफुले बढैयाताल गाउँपालिका वडा नं ३ मा रहेको प्राथमिक स्वास्थ्य केन्द्रमा इृन्टरनेटको ब्यवस्था नभएको स्थानीय सभामार्फत स्थानीय सरकारलाई जानकारी गराएपछि सो समस्या समाधान भएको साझेदारी मन्चमा जानकारी गराउनुभयो ।
स्थानीय नागरिकले स्थानिय तहमा रहेका शिक्षा, स्वास्थ्य, कृषिका थुप्रै समस्या बैठकमा राखेका थिए । सो बैठकमा बढैयाताल गाउँपालिका वडा नं. ४ का वडा अध्यक्ष कर्ण बहादुर थापाले स्थानीय सभा आफनो वडामा गठन गरी सकेको जानकारी गराउनुभयो र नागरिक र जनप्रतिनिधि विच समन्वय र सहकार्य बढ्ने विश्वास बढेको बताउनुभयो । त्यसै गरि बढैयाताल गाउँपालिका वडा नं. १ का वडा अध्यक्ष शेर बहादुर थापाले वस्ती स्तरका योजनामा सम्पुर्ण नागरिक समाज, शिक्षकहरुको सहभागिता गराएको जानकारी दिनुभयो ।
सूचना र मानव अधिकार अनुसन्धान केन्द्रका कार्यक्रम ब्यवस्थापक रविन्द्र कुमार ज्ञवालीले अब जनप्रतिनिधिले संविधानले दिएको अधिकारलाइ प्रयोग गर्दै स्थानीय नागरिकको जनगुनासोलाइ उचित सम्बोधन तथा व्यवस्थापन गर्नु पर्ने र बिकासको कार्यलाइ पनि अगाडि बढाउनु पर्नेमा जोड दिनुभयो ।
बढैयाताल उद्योग बाणिज्य संघका अध्यक्ष तथा नागरिक समाज सन्जालका अध्यक्ष बाल कृष्ण लामिछानेले यस साझेदारी मन्चको बैठकमा धेरै स्थानीय नागरिकहरुको जनगुनासो सुन्ने स्थानीय सरकारलाई अवसर मिलेको भन्दै नागरिक समाज, सञ्चारमाध्यम ,स्थानीय सरकार ,नागरिक सबै राज्यकै महत्वपुर्ण अंग भएको हँुदा शिक्षा, स्वास्थ्य, कृषि तथा विपत ब्यवस्थापनका समस्या समाधानको लागि एकजुट भएर लाग्नुपर्ने र सबै आआफ्नो ठाउँबाट जिम्मेबार र जवाफदेही भएर लाग्नु पर्नेमा जोड दिनुभयो ।
युएसआईडी,एफएचआई.३६०को सहयोगमा सूचना र मानव अधिकार अनुसन्धानकेन्द्रले बढैयाताल गाँउपालिकामा सामुदायिक बिद्यालयका बिद्यार्थीहरुमा निशुल्क स्वास्थ्य परिक्षण, सिकलसेल एनिमिया रोगको चेकजाँच निशुल्क हुनु पर्ने र सुशासन निति बनाउनु पर्ने पैरवी गरिरहेको छ ।
Discussion about this post