बाँके मंसिर १३ गते ।
बाँकेको बैजनाथ गाउँपालिकाले नौबस्ता औद्योगिक क्षेत्र संचालन र बसोबासी जनताको व्यवस्थापनका लागि ड्रोन नक्सा सर्भे सुरु गरेको छ । स्थानीय सरकारले औद्योगिक क्षेत्र संचालन र बसोबासी जनताका बस्तीको जग्गा व्यवस्थापन समाधानका लागि ड्रोन नक्सा सर्भे सुरु गरेको हो ।
गाउँपालिकाका अध्यक्ष प्रकाशबहादुर शाही नौबस्ता औद्योगिक क्षेत्रमा सबैभन्दा पहिला बस्ती व्यवस्थामा गर्नुपर्ने बताउँछन् । ‘मंगलवारदेखि नौबस्ता औद्योगिक क्षेत्र संचालन र बसोबासी जनताको बस्ती व्यवस्थापनका लागि पहिला बस्तीलाई व्यवस्थामा गर्न जरुरी छ उनले भने–‘अहिले हामी यही अभियानमा छौं ।’उनले औद्योगिक क्षेत्र संचालन र यहाँका जनताको व्यवस्थापनमा आफ्नो ध्यान केन्द्रीत भएको बताए ।
उनले आफ्नो चुनावी एजेन्डामा पनि यो मुद्दालाई उठाएकाले स्वभाविक चासो र चिन्ता रहेको बताए । औद्योगिक क्षेत्र पनि संचालनमा ल्याउने र यहाँका जनतालाई रोजगारीसँग पनि जोड्ने गरी काम गरिने उनको भनाइ छ । उनले लामो समयदेखि वस्ती व्यवस्थापनको बिषय विवादित हुँदै आएको ड्रोन नक्सा सर्भेले शुन्यबाट काम सुरु भएको बताए । यसमा सहयोग गर्न उनले स्थानीयबासीलाई आग्रह समेत गरेका छन् ।
प्रदेशस्तरको औद्योगिक क्षेत्र निर्माणका लागि बैजनाथ–३ मा ३ सय ३८ बिघा क्षेत्रफल जमिन छुट्याइएको छ । नेपालगन्ज औद्योगिक क्षेत्र व्यवस्थापन कार्यालयका अनुसार उक्त क्षेत्रभित्र २ सय ६८ घर टहरा रहेका छन् । तर त्यहाँ बसोबास गर्दै आएका स्थानीयले भने सो संख्या बढेको बताउँछन् ।
Discussion about this post