काठमाडौं मंसिर १४ गते ।
जुनेचाँदी गाउँपालिका–३ का नरबहादुर टमाटाको परिवार त्रिपालमुनी बस्न थालेको महिना दिन हुन लाग्यो । जाजरकोट बारेकोट गाँउँपालिकाको लामिडाँडा केन्द्र विन्दू भएर कार्तिक १७ गते राती गएको ६.४ म्याग्नीच्युडको भूकम्पले घर पूर्णरुपमा क्षती भएको छैन ।
तर चिराचिरा परेको घरमा बस्ने अवस्था छैन । नयाँ घर बनाउने रकम त परै जावस चिराचिरा परेको त्यही घरलाई मर्मत गर्ने रकम समेत उनीसँग छैन । घर मर्मतका लागि रकमको जोहो गर्न उनी रोजगारीको लागि भारत पस्नु परेको दुखेसो सुनाए । ‘भूकम्पले घर चिरा परेको छ । भित्र पस्नै डर लाग्छ । बालबच्चा सहित सबै त्रिपाल मुनि बस्दै आएका छन् ।
चिसोले बालबालिका बिरामी पर्न थालेका छन् । यो दुःख हेर्नुभन्दा घर बनाउने रकम जोहो गर्न नसकिएपनि कम्तीमा चिरा परेको घर ममर्त गर्ने रकम जुटाउन भएपनि भारत जान लागेको हुँ’ जमुनाह नाकामा भेटिएका उनले भने । पूर्णरुपमा क्षतीग्रस्त भएका घर बनाउन त सरकारले अहिलेसम्म रकम दिएको छैन भने झन आंशिकरुपमा क्षती पुगेका घर बनाउन रकम कहिले देला ? सरकारको राहात र पुनःस्थापनाको विश्वास नभएपछि पीडितहरु आफ्ना लालाबालालाई त्रिपालकै बासमा छाडेर रोजजागरीका लागि धमाधम भारततिर प्रवेश गरिरहेका छन् । रुपबहादुर टमाटाको पीडा पनि उस्तैछ ।
भूकम्पले घर चर्किएको छ । घरभित्र बस्ने अवस्था छैन । घर ममर्त गर्न रकम छैन । परिवारको पालनपोषण गर्ने सबै जिम्मेवारी रुपबहादुरको काँधमा छ । मौसमीरुपमा भारत जाने र रोजगारीबाट बचत गरेर ल्याएको पैसाले जेनतेन परिवारको रोजिरोटी चल्दै आएको थियो । तर भूकम्पले तहसनहस पारेपछि उनको भारत बसाइ लामो हुने अवस्था सिर्जना भएको छ । ‘वर्षमा २–३ पटक घर आउने गरेको थिए ।
अव त घर बनाउनेसम्मको पैसा कमाउनु छ कसरी आउने ? उनले भने–‘दुखारीलाई दुःखले कहिले छाड्ने रहिन्छ ।’ राहात तथा पुनःस्थापनाका लागि सरकारले काम गरिरहेको दावी गरेपनि बासको चिन्ताले सताएका पीडितहरु घर बनाउने रकमको जोहो गर्न भारत पस्न बाध्य भएका हुन् ।
Discussion about this post