बाँके पुस १४ गते ।
भारतको हैदरावादमा भएको १० औँ विश्व स्ट्रेन्थलिफ्टिङ च्याम्पियनशिपमा स्वर्ण पदक विजेता दन्तरोग विशेषज्ञ डा. प्रतिक श्रेष्ठ र रजत पदक विजेता सन्तोषकाजी शाक्यलाई एक कार्यक्रमका वीच नेपालगन्जमा बधाई तथा शुभकामना दिइएको छ । नेपालगन्जबाट पाँच जना खेलाडी सहभागी भएकोमा दुई जना खेलाडीले पदक जितेका थिए ।
लाइफ लाइन हस्पिटल, जिल्ला स्वस्ट्रेन्थलिफ्टिङ संघ बाँके र गणपति डेन्टलले संयुक्त रुपमा डा. श्रेष्ठ र शाक्यलाई बधाई तथा शुभकामना दिएको हो । १८ देखि २२ डिसेम्बर, २०२३ सम्म भारतको हैदराबादमा प्रतियोगिता भएको थियो । नेपालगन्जका डा. श्रेष्ठले ९५ किलो तौल पुरुष सिनियरतर्फको प्रतिस्पर्धामा स्वर्ण पदक जितेका थिए ।
त्यसैगरी, नेपालगन्जकै सन्तोषकाजी शाक्यले ७६ किलो तौल पुरुष मास्टर वानतर्फको प्रतिस्पर्धामा रजत पदक जित्न सफल भएका थिए । दुवै खेलाडीले नगदसहित शिल्ड, मेडल र प्रमाणपत्र पाएका थिए । प्रतियोगितामा नेपालका ४५ जना खेलाडीले सहभागिता जनाएको जनाउँदै स्वर्ण पदक विजेता डा. श्रेष्ठले उनीहरूले १६ स्वर्ण, १४ रजत र चार कांस्य पदक जितेको शाक्यले बताए ।
नेपालगन्ज उपमहानगरका मेयर प्रशान्त विष्ट र लाइफलाइन अस्पतालका अध्यक्ष अशोक श्रेष्ठ र डा. पारस श्रेष्ठले सम्मान गरेको कार्यक्रममा बोल्दै मेयर विष्टले स्ट्रेन्थलिफ्टिङको विश्व च्याम्पियनसिपमा सवर्ण र रजत पदक जितेर खेलाडीले नेपालगन्ज र नेपालको नाम विश्वभर फैलाएको बताए । उनले भने, ‘नेपालगन्जबाट प्रतिनिधित्व गरेका खेलाडीले यहाँको मात्र नभई सिंगो देशको नाम विश्व समुदायमा नाम राख्नु भएको छ । यसले अन्य खेलाडीलाई पनि उत्साहित बनाएको छ ।’
लाइफ लाइन हस्पिटलका अध्यक्ष अशोक श्रेष्ठले खेल र खेलाडीको विकासका लागि हस्पिटलले कुनै कसर बाँकी नराख्ने प्रतिवद्धता जनाए । ‘लाइफ लाइन हस्पिटलले उपमहानगरका जनप्रतिनिधि र सर्वसाधारणलाई सस्तो शुल्कमा सेवा दिँदै आएको छ । खेलाडीको उपचारमा पनि सहयोग गर्ने जानकारी गराउँछु,’ उनले भने ।
भेरी अस्पतालका बरिष्ठ फिजिसियन डा. पारश श्रेष्ठले पनि खेलाडीले आफ्नो ठाउँसँगै देशको नाम विश्वभर फैलाएको बताए । उनले खेलले मानिसको जिवन स्वस्थ र फुर्तिलो हुने बताए । ‘स्वस्थ शरिरलेमात्र काम गर्न सक्छ । खेलले शरिर स्वस्थ बनाउन मद्दत गर्छ,’ उनले भने ।
Discussion about this post