बाँके पुस १८ गते ।
विगतमा फेसबुक, टिकटक, भाइवर लगायतको प्रयोगबाट किशोरी र बालबालिकालाई विभिन्न प्रलोभन दिएर बेचबिखनका लागि सहमत गराइने गरिएकोमा हाल आएर पब्जी लगायतका गेमको माध्यमबाट पनि सो कार्य हुन थालेको छ । माइती नेपाल नेपालगन्जले जनाएअनुसार पछिल्लो समय एउटा घटना पब्जी गेमबाट बेचविखन भएको पाइएको छ ।
मानव तस्करहरुले नयाँ नयाँ प्रविधिको उपयोग गरेर बेचविखनलाई निरन्तरता दिइरहेका हुन् । पछिल्लो समयमा विभिन्न प्रकारका सामाजिक सञ्जाल नेटवर्कको प्रयोग गरेर मानवबेचविखन भइरहेकोले सो नियन्त्रण पनि निकै चुनौतीपूर्ण बन्दै गएको माइती नेपालको भनाइ छ । रोजगारी तथा विभिन्न प्रलोभनमा परेर भारत लगायत तेस्रो मुलुकमा पुगेका किशोरी र बालबालिकाको अवस्था अज्ञात रहेको माइती नेपालले जनाएको छ ।
माइती नेपाल नेपालगन्जका प्रमुख केशव कोइरालाले वार्षिक प्रतिवेदन सार्वजनिक गर्दै खोजतलासका लागि निवेदन परेकामध्ये अझै तीन सय ८४ जनाको अवस्था पत्ता लाग्न नसकेको बताए । उनले जोखिमपूर्ण काम गर्न विदेश गएका ६६२ जना किशोरी तथा बालबालिकाको विषयमा खोजतलास गरिदिन भनी परिवारबाट निवेदन परेकोमा २७८ जना मात्रै फेला परेको र अन्यको अवस्था अज्ञात रहेको बताउनुभयो ।
कोइरालाले भने–‘अज्ञात अवस्थामा रहेका ती किशोरी तथा बालबालिकाको अवस्था पत्ता लगाउन धेरै संयन्त्रलाई प्रयोग ग¥यो, तर केहीको अवस्था पत्ता लगायौ, धेरैको अवस्था अझै पत्ता लाग्न सकेको छैन ।’ मानव बेचबिखन तथा ओसारपसार विरुद्ध काम गर्ने भारत र विदेशका विभिन्न संस्थासँग समन्वय गरेर खोजी गर्ने काम गरिएको कोइरालाले बताए । माइती नेपाल नेपालगन्जका अनुसार गत वर्ष जोखिमपूर्ण यात्रामा रहेका पाँच सय ९ जनालाई सीमा क्षेत्रबाट उद्धार गरिएको छ ।
विभिन्न जिल्लाबाट मानव दलालमार्फत् जोखिमपूर्ण काममा जान लागेका ती किशोरी तथा बालबालिकालाई नेपाल–भारत सीमा क्षेत्रबाट उद्धार गरेर घर फर्काइएको हो । माइती नेपाल नेपालगन्जले गएको एक वर्षमा २ जना विरुद्ध मानव बेचबिखन सम्बन्धी घटनामा मुद्दा दर्ता गरेको थियो भने ४ जना किशोरीलाई सिपमूलक तालिम पनि प्रदान गरेको थियो । त्यसैगरी, एक वर्षमा १२ वटा घरेलु हिंसाको घटना आएकोमा ५ वटा घटनाको समाधान गरिएको र ३ वटा जबरजस्ती करणीका घटनामा माइती नेपालले पीडितको पक्षमा वकालत गरेको प्रमुख कोइरालाले बताए ।
Discussion about this post