बाँके माघ ८ गते ।
भारतको अयोध्यामा श्रीराम मन्दिरको प्राण प्रतिष्ठाको क्रममा नेपालगन्जमा पनि भब्य र्याली निकालिएको छ । जिल्लाका विभिन्न स्थानबाट आएका हिन्दूहरुले नेपालगन्जको विभिन्न चोक, गल्ली र सडकमा सभ्य र भब्य तरिकाले र्याली निकालेका छन् ।
श्रीरामको झण्डा सहित नगर परिक्रमा गरेका सर्वसाधारणहरु रामलिला मैदानमा भेला भएका थिए । र्यालीलाई भब्य र सभ्य बनाउन बाँके प्रशासनले कडा सुरक्षा ब्यवस्था मिलाएको थियो । सम्वेदनशिल क्षेत्रको पहिचान गरि उक्त स्थानमा र्याली गर्न निषेध गरेको प्रशासनले नगरका विभिन्न स्थानमा सुरक्षाकर्मी परिचालन गरेको थियो ।
र्यालीमा सर्वसाधारणको बाक्लो उपस्थिति भए पनि कुनै अप्रिय घटना नभएको बाँके प्रहरी प्रवक्ता डिएसपी नारायण डाँगीले बताए । उनले सम्वेदनशिल क्षेत्रमा र्याली तथा प्रदर्शन गर्न रोक लगाएको बताए । ‘एकदमै सजग भएर सुरक्षा ब्यवस्था मिलाएका थियौँ । सम्वेदनशिल क्षेत्रको पहिचान गरि र्याली गर्ने ठाउँको ब्यवस्था मिलाएका थियौँ,’ उनले भने, ‘सवैको साथ र सहयोगले अप्रिय घटना हुन पाएन । र्यालीलाई सभ्य, भब्य र शान्त बनाउन सहयोग गर्ने सवैलाई धन्यवाद ।’
उनले श्रीराम मन्दिर प्राण प्रतिष्ठाका क्रममा नेपालगन्जमा आयोजना हुने र्यालीलाई ब्यवस्थित बनाउन मदिरा ब्यवसायी संघ, बाँके र होटल ब्यवसायी संघ नेपालगन्जले समेत सहयोग गरेको बताए । उनले भने, ‘नागरिक समाजका अगुवा, धार्मिक गुरु, उद्योगी, ब्यवसायी, सर्वसाधारणको सहयोगले र्यालीलाई शान्त वातावरणमा सम्पन्न गर्न सक्यौँ । बाँकेका सवै जना धन्यवादका पात्र हुनुहुन्छ ।’
बाँकेका प्रमुख जिल्ला अधिकारी श्रवणकुमार पोखरेलले पनि र्याली, पूजा र भण्डारा सफल बनाउन सहयोग गर्ने सवैलाई धन्यवाद दिएका छन् । उनले सवैको साथ र सहयोगले नेपालगन्जमा भएको र्यालीलाई सफल बनाउन सकेको बताए । ‘स्थानीय प्रशासन र प्रहरीको सक्रियताले मात्र र्याली भब्य, सभ्य र शान्त भएको होइन । सवैको साथ र सहयोगले यो सम्भव भएको हो,’ उनले भने ।
Discussion about this post