बाँके माघ ११ गते ।
बाँकेको राप्तीसोनारी गाउँपालिका वडा नं. ४ बैजापुरस्थित जनशक्ति माध्यामिक विद्यालयमा आजदेखि छैठौं राप्तीसोनारी गाउँपालिका स्तरीय अध्यक्ष कप तथा १६ औं राष्ट्रपति रनिङ्ग शिल्ड छनौट प्रतियोगिता हुन लागेको छ ।
जनशक्ति माध्यामिक विद्यालयको आयोजना तथा राप्तीसोनारी गाउँपालिकाको समन्वय र सहकार्यमा सुरु हुन लागेको प्रतियोगिताको गाउँपालिकाका संयोजक तप्त बहादुर पौडेलले उद्घाटन गर्ने कार्यक्रम तय भएको छ । प्रतियोगितामा चारवटा इभेन्टमा विद्यार्थीहरुले प्रतिस्पर्धा गर्ने राप्तीसोनारी गाउँपालिकाका खेलकुद संयोजक तेजबहादुर सुवेदीले जानकारी दिए । उनका अनुसार भलिवल, कबड्डी, एथलेटिक्स र मार्सलआर्ट बिधामा विद्यार्थी खेलाडीहरुले प्रतिस्पर्धा गर्नेछन् ।
छनौट प्रतियोगिताको औपचारिक उद्घाटन दिउँसो हुने भएपनि खेलकुदका गतिविधिहरु भने आज विहानैदेखि सुरु गरिएको छ । विहान आधारभूत तहका विद्यार्थीहरुले प्रतिस्पर्धा गर्नेछन् । आधारभूत तहमा कक्षा १ देखि ३ सम्म छात्रछात्रा मध्येबाट प्रत्येक विद्यालयबाट एक जना सहभागि हुने गरी चम्चा दौड, कक्षा ४ र ५ सम्म छात्रछात्रा मध्येबाट प्रत्येक विद्यालयबाट एक जना सहभागि हुने गरी हिसाव दौड प्रतियोगि हुनेछ ।
त्यसैगरी कक्षा ६ देखि ८ सम्मका विद्यार्थीले भने छात्रछात्रातर्फ एक सय मिटर, दुई सय र चार सय मिटर प्रतिस्पर्धामा सहभागिता जनाउने छन् । शनिवारसम्म चल्ने प्रतियोगितामा यो पटक भने मार्सलआर्ट विधा पनि समेटिएको संयोजक सुवेदीले बताए । प्रतियोगितामा राप्तीसोनारी गाउँपालिकाका ५० बढी विद्यालयका करिव दुई हजार खेलाडीहरु सहभागि हुनेछन् ।
गाउँपालिकाको चार लाख, प्रदेश सरकारको एक लाख रुपैयाँको बजेट प्रतियोगिताका लागि विनियोजन भएको छ । प्रतियोगिता सम्पन्न गर्न करिव १५ लाखको हाराहारीमा खर्च अनुमान गरिएको आयोजक विद्यालयका व्यवस्थापन समिति अध्यक्ष प्रदिप रजकले बताए । प्रतियोगितालाई भव्यता दिन झाकी समेत प्रदर्शन गरिने उनको भनाइ छ ।
Discussion about this post