बाँके माघ ११ गते ।
नेपालगन्जमा आजदेखि ‘प्रथम नेपालगन्ज कप राष्ट्रिय व्याडमिन्टन प्रतियोगिता’ हुने भएको छ । बाँके जिल्ला व्याडमिन्टन संघको आयोजनामा प्रतियोगिता हुन लागेको हो । उक्त प्रतियोगिता नेपालगन्ज रंगशालास्थित कवर्ड हलमा बिहान ९ बजे उद्घाटन गरिनेछ ।
संघ बाँकेका अध्यक्ष संजय थापाले प्रतियोगिताको सबै तयारी पुरा भएको र विभिन्न जिल्लाबाट अधिकांश खेलाडी आइसकेको जानकारी दिए । उक्त प्रतियोगितामा नेपालभरबाट राष्ट्रिय सहित करिव डेढ सय जना खेलाडीले सहभागिता जनाउनेछन् । पछिल्ला वर्षहरुमा खेलाडीहरुको उपस्थिती कम हुदै गएपछि नयाँ पुस्ताका खेलाडीहरु उत्पादन गर्ने उद्देश्यले प्रतियोगिता गर्न लागिएको आयोजकले जनाएको छ । यही माघ १३ गतेसम्म चल्ने प्रतियोगितामा पाँच वटा विधा राखिएको छ ।
जसमा पुरुष एकल खुल्ला, पुरुष युगल, महिला एकल, पुरुष युगल ‘बी लेभल’ र ४५ प्लस भेट्रान्स डबल्स रहेको छ । प्रतियोगितालाई स्वच्छ तथा प्रभावकारी ढंगबाट सञ्चालन गर्नको लागि राष्ट्रिय स्तरका रेफ्री तथा अम्पायर आउनेछन् । लुम्बिनी प्रदेश खेलकुद परिषदको सहयोगमा हुन लागेको उक्त प्रतियोगिताका विजेता खेलाडीलाई ट्रफी, मेडल र प्रमाणपत्र सहित नगद पुरस्कारको ब्यवस्था गरिएको आयोजकले जनाएको छ । प्रतियोगिता सञ्चालन गर्नका लागि ३१ लाख रुपैयाँ खर्च हुने आयोजकले अनुमान गरेको छ ।
बाँकेमा करिव २५ वर्षपछि राष्ट्रिय स्तरको व्याडमिन्टन प्रतियोगिता हुन लागेको हो । यसअघि २०५५ सालमा नेपालगन्जमा राष्ट्रिय व्याडमिन्टन प्रतियोगिता भएको थियो ।
Discussion about this post