बाँके फागुन ६ गते ।
लुम्विनी प्रदेशका भौतिक पूर्वाधार मन्त्री धर्मराज चौधरीले नेपालगन्ज उपमहानगरपालिका–१४ भवनियापुर क्षेत्रको पूर्वाधार विकासमा प्रदेश सरकार गम्भीर रहेको बताएका छन् ।
आइतवार भवानीयापुरदेखि इदगाह सडकको ग्रावेलिङ तथा माटो पटानको सुभारम्भ गर्दै उनले नेपालगन्ज सहरसँग जोडिएपनि भवनियापुर विकासका दृष्टिकोणले पछाडी परेको बताए । उनले लुम्विनी प्रदेश सरकारले पूर्वाधार निर्माणमा चासो दिएर भवानीपुरदेखि इदगाह रोडको स्तरोन्नती गरिन लागिएको बताए ।
कूल ७५ लाखको लागतमा सडक निर्माण हुन लागेको हो । उनले भौतिक पूर्वाधार मन्त्रालयको ४५ लाख र सहरी विकास मन्त्रालयको ३० लाख गरी ७५ लाखको लागतमा सडक स्तरोन्नती गर्न लागिएको छ । उक्त सडकलाई कालोपत्रे गर्ने गरी योजना बनाइएको उनले सुनाए ।
यस्तै प्रदेश सभा सदस्य आदेश अग्रवालले ग्रामीण क्षेत्रको पूर्वाधार विकासमा आफुले पहल गरिरहेको उल्लेख गरे । उनले ग्रामीण क्षेत्रको सडक, ढल तथा नाला निर्माणका कामहरु अझै पनि प्रभावकारी ढंगबाट हुन नसकेको भन्दै आफ्नो पालामा ती कामहरुलाई पूर्णता दिने गरी लागि परेको बताए ।
यसअघि लुम्विनी सभा सदस्य अग्रवालले नेपालगन्जको विभिन्न स्थानमा रहेका मन्दिर र मस्जिद जीर्णोधारका लागि प्रक्रिया अगाडी बढाइसकेका छन् । बाँके निर्वाचन क्षेत्र नं. २ ख बाट विजयी प्रदेश सभा सदस्य अग्रवालले निर्वाचन क्षेत्र विकास कोषको रकमबाट नेपालगन्ज उपमहानगरका विभिन्न वडामा रहेका मन्दिर र मस्जिदका जीर्णोधारको लागि प्रक्रिया अगाडी बढाएका हुन् ।
उनले पर्यटन डिभिजन कार्यालय कोहलपुरका इन्जिनियरसहितको प्राविधिक टोलीसँग सम्बन्धित मन्दिर र मस्जिदको अनुगमन गरेका छन् । उनले आइतवार धम्बोझीस्थित कालीमाता मन्दिर, वाल्मिकी टोलस्थित वाल्मिकी मन्दिर, वडा नं. ३ स्थित फूलबारी मस्जिद, वडा नं. ४ स्थित मदिना मस्जिद र रामजानकी मन्दिरको सौन्दर्यकरणका लागि छलफल र अवलोकन गरेका थिए ।
उनले धार्मिक तथा सामाजिक सद्भावका लागि नेपालगन्जका मन्दिर र मस्जिदको सौन्दर्यकरण गर्न लागेको बताए । नेपालगन्ज धार्मिक तथा सामाजिक सद्भावको सहर भएको बताउँदै उनले यसलाई जोगाई राख्नुपर्ने धारणा राखे ।
Discussion about this post