बाँके फागुन ७ गते ।
राष्ट्रिय गौरवको हुलाकी राजमार्ग अन्तर्गत पर्ने नेपालगन्जदेखि बर्दिया सदरमुकाम गुलरिया जोड्ने सडक निर्माणको काम बजेट अभावमा अवरुद्ध भएको छ । दुई अर्व ७८ करोडको लगानीमा बाँकेको नेपालगन्जदेखि बर्दियाको गुलरिया जोड्ने २८ किलोमिटर हुलाकी राजमार्ग निर्माणमा अर्थमन्त्रालय बाधक बनेको छ ।
अर्थमन्त्रालयले बजेट निकासा नगरेका कारण गएको असार महिनादेखिको ठेकेदार कम्पनीले भुक्तानी पाउन सकेको छैन । जसका कारण राजमार्ग निर्माणको काम प्रभावित भएको छ । सडक निर्माणको ठेक्का पाएको शर्मा एण्ड कम्पनीका म्यानेजर नवीन शर्माले असार महिनादेखि भुक्तानी पाउन नसकिएको बताए ।
उनले भने–‘गएको असार महिनादेखि भुक्तानी नियमित हुन सकिरहेको छैन । भुक्तानी नियमित नहुँदा काम स्वभाविकरुपमा प्रभावित भएको छ ।’ नेपालगन्ज गुलरिया जोड्ने यो हुलाकी राजमार्गका लागि अर्थमन्त्रालयले सम्झौता अनुरुप दुई अर्व ७८ करोड २९ लाख ४१ हजार ८३६ रुपैयाँ निकासा दिनुपर्ने हो । तर मन्त्रालयले ७२ करोड रुपैयाँमात्रै निकासा गरेको छ । जवकी एक अर्व १६ करोड रुपैयाँ खर्च भइसकेको छ ।
बाँकी ४४ करोड रुपैयाँ निर्माण कम्पनीलाई दिन नसक्दा पश्चित तराईको मेरुदण्ड मानिने हुलाकी राजर्मागको काम प्रभावित भएको हो । कार्यालयले बारम्बार पत्र लेख्दै अर्थमन्त्रालयलाई बजेट नरोक्न आग्रह गर्दा समेत मन्त्रालयले वेवास्ता गर्दै आएको छ । आयोजनाले छैठौं पटक पुस २२ गते बजेट निकासाका लागि अर्थमन्त्रालयलाई आग्रह गर्दै पत्र पठाएपनि अहिलेसम्म सुनुवाई नभएको हुलाकी राजमार्ग योजना कार्यालयका प्रमुख लीलाबहादुर भण्डारीले बताए ।
उनले भने–‘अर्थमन्त्रालयलाई धेरै पटक पत्राचार गरिसक्यौं तर बजेट निकासा भएको छैन । बजेटको चरम अभाव भएको छ । बजेट नहुँदा सम्झौता अवधिमा काम सक्न गाह्रो छ ।’ यो राजमार्गको २०८३ मंसिरमा निर्माण सम्पन्न गर्ने गरी शर्मा एण्ड कम्पनीले ठेक्का लिएको छ । कम्पनीले आवासिय क्षेत्र बाहिर चार लेनको करिव १२ किलोमिटर र आवासिय क्षेत्रमा पर्ने दुई लेनको करिव ७ किलोमिटर राजमार्ग अस्फाल्ट गर्ने अवस्थामा पुर्याएको छ । तर बजेट अभावका कारण निर्माणको काममा बाधा पुगेको छ ।
Discussion about this post