बाँके बैशाख ३० गते ।
बाँकेको राप्ती सोनारी गाउँपालिकामा आर्थिक वर्ष ०८०÷०८१ का भौतिक पूर्वाधारतर्फका ठूला योजनाहरु करिव पूरा भएका छन् । पक्की सडक निर्माणदेखि नाला निर्माण र भवन निर्माणका कामहरु करिव पूरा भएका छन् ।
राप्ती सोनारी गाउँपालिकाका टेक्निसियन दुर्गा केसीका अनुसार भौतिक पूर्वाधारतर्फका अधिकांश योजनाहरु सम्पनन भइसकेका छन् । कतिपय योजनाहरु निर्माण सम्पन्न भएर पनि भुक्तानीको प्रक्रियामा रहेको उनले बताए । समयमै ठेक्का प्रक्रिया समयमै हुनु र निर्माण कम्पनीले पनि काम समयमै गरेका कारण ठूला योजनाहरु समयमै सम्पन्न भएका हुन् ।
करिव पाँच किलोमिटर सडक कालोपत्रे गरिएको छ भने करिव दुई हजार मिटर नाला निर्माणको काम अन्तिम चरणमा पुगेको छ । राप्ती सोनारी गाउँपालिका वडा नं.४ मा वनतरीदेखि रामखुट्टी रिङरोड कालोपत्रेको काम पूरा भइसकेको छ । ६ सय ६५ मिटर सडक कालोपत्रे गरिएको टेक्निसियन केसीले जानकारी दिए ।
उक्त सडक कालोपत्रेका लागि करिव ३३ लाख रुपैयामा ठेक्का सम्झौता भएको थियो । त्यसैगरी राप्ती सोनारी गाउँपालिका वडा नं.२ मा कम्दी कचनापुर एक हजार ३ सय ५० मिटर सडकको कालोपत्रे गर्ने काम पनि पूरा भएको छ । करिव एक करोडको लागतमा यो योजनाको निर्माण कार्य पूरा भएको हो । वडा नं.३ मा पर्ने खैरेनीदेखि सरस्वती माविसम्मको एक हजार ३ सय ५ मिटर सडकको कालोपत्रे पूरा भएको छ ।
८७ लाखमा सडक कालोपत्रे गर्ने काम पूरा भएको टेक्निसियन केसीले जानकारी दिए । वडा नं.३ मै पर्ने जनजागृती स्कुलदेखि सरस्वती माविसम्मको ३ सय २७ मिटर सडकको कालो पत्रे गर्ने काम पनि पूरा भइसकेको छ । ३ सय २७ मिटर सडक कालोपत्रे गर्न २२ लाख रुपैयाँमा ठेक्का सम्झौता भएको थियो । वडा नं.७ को नन्कौपुर पोखरामाता बाटो कालोपत्रे गर्ने काम पनि अन्तिम चरणमा पुगेको छ । ३२ लाखको सम्झौतामा ५ सय ५२ मिटर सडक कालोपत्रेको काम धमाधम भइरहेको छ ।
वडा नं.८ र ९ जोड्ने गौरी टोल देखि ढकेरीसम्मको नाला निर्माणको काम पनि अन्तिम चरणमा पुगेको छ । २७ लाखको लागतमा ९ सय मिटर नाला निर्माणको काम भइरहेको छ । त्यसैगरी वडा नं.२ को खल्यानदेखि मिन सिजवालको घरसम्म ७ सय ४३ मिटर नाला र ४ सय २३ मिटर सडक निर्माणको काम पनि अन्तिम चरणमा छ । करिव ५२ लाखको लागतमा नालासहितको सडक निर्माणको काम भइरहेको हो । त्यसैगरी वडा नं.८ मा रहेको वर्थिङ सेन्टरको काम पूरा भइसकेको छ । २४ लाख ५० हजारको लागतको वर्थिङ सेन्टरको काम पूरा भएको हो ।
वडा नं.२ मा रहेको लक्ष्मी माविको होस्टेल तला थप गर्ने योजना पनि अन्तिम चरणमा पुगेको छ । ३२ लाखको लागतमा भवन निर्माणको काम अन्तिम चरणमा पुगेको केसीले बताए । ‘लगभग ठूला योजनाहरु सम्पन्न भइसकेका छन् र केही सम्पन्नको अन्तिम चरणमा छन् केसीले भने–‘समयमै ठेक्का हुनु र निर्माण कम्पनीले पनि कामलाई तीव्रता दिएका कारण समयमै योजनाहरु सम्पन्न भए ।’ उनले वडा नं. १ मा सिंचाई बोडिङ सम्वन्धी केही योजनाहरु ठेक्काको चरणमा रहेको बताए ।
ती योजनाहरु साना भएकाले आर्थिक वर्षमै सकिने उनको भनाइ छ । हिउँदे अधिवेशनबाट संशोधित भएर आएका योजनाहरुको कार्यान्वयन गर्ने तयारीमा रहेको जानकारी दिँदै गाउँपालिकाका अध्यक्ष तप्त बहादुर पौडेलले समयमै काम सम्पन्न गर्ने गरी निगरानी बढाइएकोले यो सम्भव भएको बताए । विकास निर्माणका योजनाहरु ठेक्का लिने तर काम नगर्ने प्रवृत्ति छ । तर राप्ती सोनारीमा ठूला योजनाहरुको काम समयमै सम्पन्न हुँदा त्यसले नागरिकलाई सहजता प्रदान गर्ने उनको भनाइ छ ।
पालिकाका अध्यक्ष पौडेलले भौतिक पूर्वाधार निर्माणलाई पालिकाले प्राथमिकता दिएको बताए । उनले माग र प्राथमिकताको आधारमा विकास निर्माणको कामलाई प्राथमिकता दिइएको उल्लेख गरे । पालिकाका उपाध्यक्ष मनिषा सिंह थारुले भौतिक पूर्वाधार निर्माणका कामहरु गुणस्तरीय बनाउन अनुगमनलाई प्रभावकारी बनाइएको बताइन् ।
Discussion about this post