बाँके असार २ गते ।
गर्मीका कारण बेहोस भएर लडेका एक जनाको मृत्यु भएको छ । पछिल्लो समय पश्चिम नेपालको तराईका जिल्लामा अत्यधिक गर्मीसँगै तातो हावा चलेपछि बाँकेको जनजिवन कष्टकर बनेको छ । गर्मीले बेहोस हुने क्रम सुरु भएको छ ।
खजुरा गाँउपालिकाका सुन, चाँदी व्यवसायी टोपेन्द्र सुनार नेपालगन्ज–गुलरिया सडकखण्ड अन्तरगत खजुराको धनौलीमा बेहोस भएर लडेका थिए । उनको गर्मीका कारण हृदयघात भएर ज्यान गएको भेरी अस्पतालले जनाएको छ ।
खजुरा बजारमा मेट्रो ज्वैलर्स संचालन गर्दै आएका सुनार आइतवार अपरान्ह घरबाट पसलतर्फ जाँदै गर्दा चक्कर लागेपछि मोटरसाइकल रोकेर सडक किनारमा बस्ने वित्तिकै बेहोस भएको प्रत्यक्षदर्शी बताउँछन् । खजुराको धनौलीमा बेहोस भएका सुनारलाई स्थानीय र प्रहरीले उद्दार गरि भेरी अस्पताल पुर्याउँदा चिकित्सकले मृत घोषणा गरेको पारिवारिक स्रोतले जनाएको छ ।
गर्मीका कारण शनिबार १०४ वर्षीय कैलाश गिरीको मृत्यू भएको थियो । गर्मीका कारण स्वास प्रस्वासमा समस्या देखिएपछि उनलाई भेरी अस्पताल लगिएको थियो । भेरी अस्पतालमा पुर्याएको ३० मिनेटमै गिरीको मृत्यू भएको नीलसागर बृद्धाआश्रमका संचालक सरिता खनालले बताइन् ।
उनी विगत ९ वर्षदेखि नेपालगन्जस्थित नीलसागर बृद्धाश्रममा बस्दै आएका थिए । तर, गर्मीका कारण मृत्यू हुनेको संख्या यकिन जानकारी नभएको बाँकेका प्रहरी प्रवक्ता प्रहरी नायव उपरीक्षक नारायण डाँगीले बताए ।
उनले गर्मीका कारण मृत्यू भएको तथ्यांक जिल्ला प्रहरी कार्यालयसँग नभएको बताए । ‘गर्मीका कारण मृत्यू भएको दावी गर्न सकिने अवस्था छैन । गर्मीसँगै अन्य कारणले मृत्यू भएको हुन सक्छ,’ उनले भने, ‘गर्मीका कारण सुनारको मृत्यू भएको भनिएको छ, तर उहाँ दीर्घरोगी भएको पारिवारिक स्रोतबाट जानकारी आएको छ । अस्पतालले प्रमाणित गर्ने विषय हो । प्रहरीले गर्मीकै कारण मृत्यू भएको प्रहरीले ठोकुवा गर्न मिल्दैन ।’
बाँकेमा आइतवार पनि गर्मी यथावत छ । ४४ दशमवल २ डिग्री सेल्सियस पुगेको यहाँको तापक्रम विगत एक सातादेखि ४३–४४ डिग्री मापन हुँदै आएको छ ।
Discussion about this post