बाँके असार २३ गते ।
कोहलपुर नगरपालिकाको ‘मनसुन पूर्वतयारी तथा प्रतिकार्य योजना २०८१’ पारित भएको छ । कोहलपुर नगरपालिकाका नगर प्रमुख पूर्ण प्रसाद आचार्यको अध्यक्षतामा कोहलपुर नगरपालिका नगर विपद् व्यवस्थापन समितिको आज बसेको बैठकले प्रतिकार्य योजना पारित गरेको विपद व्यवस्थापन शाखा प्रमुख समेत रहेका नगर प्रहरी प्रमुख वीरबहादुर थापाले जानकारी दिए ।
उनका अनुसार मनसुन पूर्वतयारी तथा प्रतिकार्य योजना पारित भएसँगै त्यसको कार्यान्वयन पनि सुरु भएको उनले बताए । समितिले यो बर्खायाममा बाढी र डुवानबाट नगरका पन्ध्र वडाका ३ हजार १ घरधुरीका १३ हजार ६३० जनसंख्या प्रभावित हुने प्रक्षेपण गरेको छ । सबैभन्दा धेरै वडा नं.८, ९, १, १२, १३ र १४ मा बाढी र डुवानको जोखिम देखिएको छ ।
वडा नं.१२ मा एक हजार घरधुरीका चार हजार २ सय घरधुरी प्रभावित हुने प्रक्षेपण गरिएको छ । थारुगाउँ, दीपज्योति टोल, शान्ति टोल, निबुवा, जानकी टोल, सुन्दरबस्ती, मसुरीखेत, रामजानकी टोल, रोहिणी, प्रगति टोल र स्कुल टोल जोखिममा रहेको पहिचान भएको प्रतिकार्य योजनामा उल्लेख छ । त्यसैगरी वडा नं.१३ का सिमरी, झोलुंगे पुलको दायाँबायाँ, भरैया, थारुगाउँ, खड्कवार, नेरामाविको उत्तरवस्ती गरि १७५ घरधरीका ७४० जनसंख्या प्रभावित हुने अनुमान गरिएको छ । वडा नं.१४ मा हवलदारपुर, गीतापुर, उढरापुर र रिहार गरी १६० घरधुरीका आठ सय परिवार जोखिममा छन् ।
वडा नं.८ का आठ सय घरधुरीका ३ हजार दुई सय जनसंख्या जोखिममा छन् । मन्नापुर, झर्कट्टी, पिपरीचोक टोल जोखिममा परेका छन् । वडा नं.९ का गणेश टोल, भेरी ग्याँसको पूर्व तथा उत्तरका ३७५ घरधुरीका एक हजार १९५ जनसंख्या प्रभावित हुने आंकलन गरिएको छ । वडा नं.१ का सबै टोल जोखिममा छन् । १५० घरधुरीका ७५० जनसंख्या प्रभावितको आंकलन गरिएको छ । यसैगरी वडा नं.१० मा एकतानगर, चटार गाउँ, रामनगर, जीवनज्योति स्कुल आसपास, डुडुवाखोला आसपासका १२० घरधुरीका ६ सय जनसंख्या प्रभावितको प्रक्षेपण गरिएको छ ।
नगरपालिका क्षेत्रको करिव ६० किलोमिटर क्षेत्रमा डुडुवाखोला, किरणनाला, सानो डुडुवानाला, इटानाला, रोहिणी खोला, वग्ने गर्छन् । खासगरी डुडुवा खोला, डुडुवा नाला र किरणनालाले यसक्षेत्रमा बाढी र डुवानको जोखिममा पार्ने गरेका छन् । समितिको बैठकमा असार ५ गतेको हावाहुरीले पु¥याएको क्षतीको विवरण समेत सार्वजनिक गरिएको छ । उक्त हावाहरीले ११६ घरधुरीमा क्षती पु¥याएको थियो भने ३५५ जना मानिसहरु प्रभावित भएका थिए ।
एकजनाको मृत्यु समेत भएको थियो । बैठकले पीडितहरुको राहातका लागि जिल्ला विपद् व्यवस्थापन समिति र प्रदेश समितिलाई सिफारिस गर्ने निर्णय समेत गरेको छ । बैठकलाई सम्वोधन गर्दै नगर प्रमुख आचार्यले विपद्सँग जुध्न सबैको सहयोग, समन्वय र सहकार्य जरुरी रहेको बताए । उनले विपद् पूर्वको प्रतिकार्य योजनालाई प्रभावकारीरुपमा कार्यान्वयन गर्न पनि निर्देशन दिए । अहिलेपनि निरन्तरको झरीले थुप्रै वडाहरुमा डुवानको समस्या देखिएको भन्दै सबैलाई विपद्मा सहयोगी बन्न आग्रह गरे ।
बैठकमा नगर उपप्रमुख संगिता सुवेदी, प्रमुख प्रशासकीय अधिकृत धोलकराज ढकाल, रणबम गणका सेनानी अर्जुनबहादुर थापा, इप्रका कोहलपुरका प्रमुख धर्मराज भण्डारी, राजनीतिक दलका प्रतिनिधिहरु, वडाअध्यक्षहरु लगायतको सहभागिता रहेको थियो । उनीहरुले प्राकृतिक विपत्तीसँग जुध्न, पूर्वतयारीका कार्यक्रमहरुलाई प्रभावकारी बनाइनुपर्ने, विपद्को समयमा उद्दार, राहात र व्यवस्थापनलाई समेत प्रथामिकतामा राखेर योजना बनाउनुपर्नेमा जोड दिएका थिए ।
Discussion about this post