बाँके भदौ २५ गते ।
बाँकेको खजुरामा रहेको कुखुरा विकास फर्मले वार्षिक लक्ष्य भन्दा बढी लोकल कुखुराका चल्ला उत्पादन तथा बिक्री गरेको जनाएको छ ।
गत आर्थिक बर्ष २०८०/८१ मा एक लाख ८२ हजार चल्ला उत्पादन गरी वितरण गरेको कुखुरा बिकास फर्मका प्रमुख डा. सुमन खनालले बताए । फर्मलाई एक लाख ५० हजार चल्ला उत्पादन गर्ने लक्ष्य तोकिएको थियो । जसमध्ये १० हजार चल्ला फर्ममै राखेर एक लाख ७२ हजार चल्ला किसानलाई वितरण गरिएको उनले बताए ।
खनालले भने,‘चालु आर्थिक बर्ष २०८१/८२ मा पनि एक लाख ५० हजार कुखुराको चल्ला उत्पादन गर्ने लक्ष्य राखिएको छ । यो वर्ष तोकिएको लक्ष्य पुरा गर्न मेहनतका साथ लागेकाले सजिलै लक्ष्य पुरा हुने छ ।’
गत आर्थिक वर्षमा फर्मले चल्ला, कुखुरा र अण्डा बिक्री गरेर एक करोड ७ लाख २ हजार एक सय ९ रुपैयाँ राजस्व सङ्कलन गरेको थियो । अण्डाबाट ७६ लाख १० हजार ७ सय २५, कुखुराबाट २४ लाख ७१ हजार ७ सय ६७ र अण्डाबाट ६ लाख १९ हजार ६ सय १७ रुपैयाँ सङ्कलन भएको खनालको भनाई छ ।
फर्मले चालु आर्थिक वर्ष २०८१÷८२ को साउन र आधा भदौसम्ममा करिब ६ लाख रुपैयाँ राजस्व सङ्कलन गरिसकेको खनालले बताए । यद्यपि, अहिले ब्रेक पोइन्ट भएकाले ह्याचरी खाली राख्ने समय भएकाले असोजको अन्तिम साताबाट मात्रै चल्ला उत्पादन र बिक्री गर्ने फर्मले जनाएको छ ।
२०३४ सालमा स्थापना भएको कुखुरा बिकास फार्मले स्थापना कालदेखि नै लोकल कुखुरा संरक्षण गर्न चल्ला उत्पादन तथा बिक्री गर्दै आएको छ । फर्मले लोकल कुखुराको जात अन्तर्गत सकिनी, घाँटी खुइले, प्वाँख उल्टे, खजुरा सकिनी क्रस, न्यु हेम्पसायर, ब्लक अस्ट्रलोक र भारती लोकल जात कडक नाथ गरी ७ प्रकारका कुखुराका चल्ला उत्पादन तथा विक्री गर्ने गर्दछ ।
फर्मले अहिले लोकल कुखुराको एक दिने चल्ला ४५ रुपैयाँमा विक्री गरिरहेको छ । भाले कुखुरा ३ सय रुपैयाँ प्रति किलोका दरले बिक्री हुने गरेको छ । साथै चल्ला उत्पादन गर्न नसकिने अण्डा प्रति वटा ९ रुपैयाँको दरले विक्री गर्ने गरेको फर्मले जनाएको छ ।
Discussion about this post