चितवन, भदौ १६ गते ।
रसुवाको भोटेकोशी नदीमा आएको भीषण बाढीपछि त्रिशूली र नारायणी नदीको तटीय क्षेत्रमा भेटिएका शवको पहिचान प्रक्रिया तीव्र पारिएको छ । हालसम्म सङ्कलन गरिएका ३२१ शवमध्ये २८० शवको फरेन्सिक परीक्षण र डीएनए नमुना सङ्कलन गरिएको छ ।
फरेन्सिक परीक्षण र डीएनए नमुना सङ्कलनपछि ती शवलाई चितवनको देवघाटस्थित व्यवस्थापनस्थलमा सुरक्षित रूपमा व्यवस्थापन गरिएको छ । शवको पहिचान खुल्न नसके पनि भविष्यमा पहिचान गर्न सकिने गरी अन्तर्राष्ट्रिय मापदण्डअनुसार अभिलेखीकरणसमेत गरिएको प्रहरीले जनाएको छ ।
भरतपुर अस्पतालका प्रवक्ता डा. रामप्रसाद सापकोटाका अनुसार भदौ १० गते रातिदेखि सुरक्षाकर्मीले त्रिशूली नदीबाट सङ्कलन गरेका शव अस्पतालमा ल्याउन थालेका थिए । भदौ ११ गते बिहानदेखि फरेन्सिक विज्ञको नेतृत्वमा चिकित्सक टोली परिचालन गरी शव पहिचानका लागि आवश्यक परीक्षण, डीएनए तथा अन्य जैविक नमुना सङ्कलन र अभिलेखीकरण सुरु गरिएको थियो ।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार त्रिशूली र नारायणी नदीबाट हालसम्म ३२१ शव सङ्कलन गरिएको छ । तीमध्ये १२ शवको सनाखत भइसकेको छ । सनाखत भएका शव आफन्तले बुझिसकेका छन् । सङ्कलित शवमध्ये ६६ महिला, ११६ पुरुष, सात बालक र छ बालिका छन् । १२६ शवको भने पहिचान खुल्न सकेको छैन ।
देवघाटस्थित व्यवस्थापनस्थलमा भदौ १३ गते ९६, भदौ १४ गते १०३ र भदौ १५ गते ८१ शव व्यवस्थापन गरिएको प्रहरी उपरीक्षक पौडेलले बताए ।
उनका अनुसार नदी किनारमा शव खोजी कार्य अझै जारी छ । नदीबाट फेला पर्ने शवलाई भरतपुर अस्पताल ल्याएर फरेन्सिक परीक्षण तथा डीएनए नमुना सङ्कलन गरेपछि देवघाटस्थित व्यवस्थापनस्थलमा सुरक्षित रूपमा व्यवस्थापन गर्ने प्रक्रिया निरन्तर चलिरहेको छ ।
Discussion about this post