बाँके कात्तिक १५ गते ।
जिल्ला प्रहरी कार्यालय बाँकेले अपराध अनुसन्धान तथा चोरी निकासी नियन्त्रणका लागि आफू मातहतका प्रहरीलाई सूचकको रुपमा सादा पोशाकमा खटाएको छ । सादा पोशाकमा खटिएका प्रहरीले अपराध गर्ने ब्यक्ति र तस्करीको बारेमा आफूभन्दा उपल्लो निकायलाई सूचना दिने जिम्मेवारी पाएका छन् । तर, बाँके प्रहरीले परिचालन गरेका घुमुवा प्रहरीले बाँके प्रहरी प्रमुख एसपी तुलबहादुर कार्कीलाई गुम्राहमा पारेर असुली धन्दामा लागेका छन् ।
घुमुवा प्रहरीको टोलीले सम्बन्धित क्षेत्रको प्रहरी एकाईलाई जानकारी नदिएर छापा मार्ने मात्र गर्दैनन् बरामद भएको भन्दा कम सामान देखाउँदै समेत आएको एक प्रहरी अधिकृतले बताए । उनका अनुसार, घुमुवा प्रहरीलाई छापा मार्ने अधिकार नभई कुनै अवैध सामान भएको पुष्टि भए वा अपराधमा संलग्न ब्यक्ति फेला परे नजिकको प्रहरी एकाईलाई सूचना दिने र पक्राउ गर्न सघाउने जिम्मेवारी दिइएको हुन्छ ।
बाँके प्रहरीले परिचालन गरेका घुमुवा प्रहरीले तस्करसँग मिलेर मोटो रकम लिइरहेका छन् नै धेरै सामान बरामद भए पनि थोरै मात्र देखाउने गरेको स्रोतले अनलाइन खोजखवरलाई जानकारी दिएको छ । ‘तस्करसँग मिलेर थोरै सामान बरामद गरेको देखाउँछन् । र, तस्करसँगको मिलोमतोमा धेरै सामान तस्करी गराउन सघाउँछन्,’ स्रोत भन्छ, ‘घुमुवा प्रहरीको चलखेल अति धेरै छ । उनीहरुको चालबाजी बाँके प्रहरी प्रमुखले समेत बुझ्न नसकेको देखिन्छ ।’
यी घुमुवाले जुवाखालबाट समेत पैँसा उठाइरहेका छन् । उनीहरुकै निगरानीमा नेपालगन्जमा ठूलाठूला जुवा भइरहेको स्रोतले जानकारी दिएको छ । ‘जुवाडेलाई जोगाउन घुमुवा प्रहरीले जुवाखालबाट टन्नै पैँसा लिएकै कारण अहिले बाँकेमा जुवातास मौलाएको छ,’ स्रोतले भन्यो ।
रकम लुकाउनकै लागि घुमुवा प्रहरीले नेपालगन्जका एक हुण्डी कारोवारीको घरमा छापा मारे । छापा मार्नुअघि ति घुमुवा प्रहरीले न त जिल्ला प्रहरी कार्यालयलाई जानकारी दिए न त वडा प्रहरी र प्रहरी पोष्ट बसपार्कलाई नै सूचना दिए । हुण्डी कारोवारीको घरमा छापा मारेर घुमुवा प्रहरीले ३२ लाख रुपैयाँ बरामद गरे, तर जिल्ला प्रहरी कार्यालयमा ८ लाख रुपैयाँमात्र दाखिला गरेको स्रोतले जनाएको छ । ‘३२ लाख मध्ये ८ लाख दाखिला गरि बाँकी रकम घुमुवा प्रहरीले झ्वाम पारे,’ एक प्रहरी अधिकृतले भने ।
घुमुवा प्रहरीको कार्यशैलीले बाँकेका सर्वसाधारण आजित भएका छन् । अनुसन्धान र सूचनाका लागि परिचालन भएका प्रहरीले दिनदहाडै रकम असुली गरेको समाचार बाहिर आए पनि बाँके प्रहरी प्रमुख एसपी कार्कीले घुमुवा प्रहरी प्रति उदारभाव देखाउनुले उनको पनि मिलोमतो छ भन्ने आशंका सर्वसाधारणले गर्न थालेका छन् । ‘घुमुवा प्रहरीको ज्यादती विरुद्ध प्रमाण सहितका समाचार बाहिर आउँदासमेत एसपी सावले कुनै प्रतिक्रिया नदिनुले उहाँको पनि संलग्नता छ की भन्ने शंका उब्जेको छ,’ स्रोत भन्छ, ‘एसपी सावले समयमै एक्सन नलिए घुमुवा प्रहरीको मनोबल बढेर असुली धन्दा गर्न अझ धेरै हौसला बढ्ने निश्चित छ ।’
बाँकेका प्रहरी प्रमुख एसपी तुलबहादुर कार्कीको निर्देशनमा जिल्लामा जुवातास विरुद्ध प्रहरी आक्रामक रुपमा उत्रिएको छ । तर, एसपी कार्कीलाई गुम्राहमा पारे घुमुवा प्रहरीले जुवाखालबाट बरामद गरेको रकम नै गायव पारेका छन् । कार्तिक ५ गते राती राप्तीसोनारी ६ स्थित संजय रानाको घरबाट ३ लाख ९१ हजार रुपैयाँ सहित २० जना जुवाडे पक्राउ परे । उक्त जुवाखालमा घुमुवाका इन्चार्ज प्रहरी हवल्दार आतिस खानको नेतृत्वको टोली पनि पुगेको थियो । एसपीलाई गोप्य सूचना प्राप्त हुना साथ उनले वडा प्रहरीबाट दुई जना प्रहरीलाई गाडीसहित राप्तीसोनारी पठाएका थिए । प्रहरीले सफलता पनि हात पार्यो ।
त्यहाँ २० जना जुवाडेसहित करिव १० लाख रुपैयाँ खालबाटै प्रहरीले फेला पारेको थियो । तर घुमुवा प्रहरीले ६ लाखबढी रुपैयाँ गायव पारेको एक प्रहरी अधिकृतले बताए । ६ लाख बढि रुपैयाँ बरामद भएको थियो, तर घुमुवा प्रहरीका इन्चार्ज प्रहरी हवल्दार खानको टोलीले ३ लाख ९१ हजार रुपैयाँ मात्रै बरामद भएको एसपी सावलाई जाहेर गर्यो,’ ति अधिकृतले भने, ‘बरामद भएको ६ लाख बढी रकममध्ये आधा रकम जुवाडेलाई नै फिर्ता गर्ने सहमति घुमुवा इन्जार्च खानले गरेको देखिन्छ ।’
कुरा बाहिरिन थालेपछि खानले जुवाडेलाई सुटुक्क रकम फिर्ता गरेको अनलाइन खोजखवरलाई सूचना प्राप्त भएको छ । तर, खानसहित पुगेका घुमुवाका प्रहरी जवान वीरबहादुर ताउलेले भागबन्डामा परेको रकम फिर्ता नगरेपछि कुरा बाहिरिएको हो । उनले ४० हजार रुपैयाँ जुवाडेलाई फिर्ता नगरेपछि जुवाडेहरु रकम फिर्ता गर्न ताकेता गरेपनि ताउलेले अझैसम्म रकम फिर्ता नगरेको स्रोतले जानकारी दिएको छ । उक्त घटनाको बारे एसपी कार्कीले सूचना पाए पनि यस बारेमा उनले मुख खोलेका छैनन् ।
बाँकेमा हवल्दार खानको नेतृत्वमा ताउलेसहित प्रहरी हवल्दार राम सुमन चौधरी, सहायक हवल्दार शशी शाह, प्रहरी सहायक हवल्दार गंगाराम मल्ल, प्रहरी जवान विनोद केसी घुमुवाका रुपमा परिचालन छन् । जुवाडेहरुसँग मात्र होइन उनीहरुले तस्करसँग पनि रकम असुल्दै आएका छन् ।
समाचार बाहिर आएपछि एसपी कार्कीले घुमुवा प्रहरीसँग सोधपुछ गर्छन् । केरकार गर्छन्, तर खान पल्केका घुमुवा प्रहरीले आमा, छोराछोरी र भगवानको कसम खाएर एसपीलाई प्रभावित पार्दै आएका छन् । ‘एसपी सावको सोझोपनको फाइदा उठाउँदै मोटो रकम असुल्दै आएका छन् । चारैतर्फ हात फैलाएर मोटो रकम असुल्न भ्याएका छन्,’ एक प्रहरी अधिकृतले भने ।
Discussion about this post