बर्दिया कात्तिक २५ गते ।
पर्याप्त वर्षाले यस वर्ष बर्दियामा धान उत्पादन बढ्ने भएको छ । विगतमा किसानले अति वर्षा, बाढी र खडेरीको सास्ती भोग्दै आएकोमा यस वर्ष मौसम अनुकूल हुँदा उत्पादन ७ प्रतिशतसम्म बढ्ने अनुमान गरिएको एकीकृत कृषि तथा पशुपंक्षी विकास कार्यालयले जनाएको छ । बर्दियामा ५० हजार १ सय हेक्टरमा धान खेती हुने गर्छ ।
गत वर्ष बर्दियामा धानको उत्पादन २ लाख २५ हजार ४ सय ५० मेट्रिक टन थियो । यस वर्ष अनुकूल मौसमले धानको उत्पादन ५ देखि ७ प्रतिशत बढ्ने अनुमान गरिएको एकीकृत कृषि तथा पशुपंक्षी विकास कार्यालयका प्रमुख सागर ढकालले बताए । ’समयमा पर्याप्त पानी परेको, मलको अभाव नभएको र उन्नत जातको बीउले यस वर्ष उब्जनी राम्रो भएको छ,’ उनले भने । सिँचाइ सुविधा नभएको ठाउँमा यस वर्ष धानको उत्पादन केही राम्रो भएको किसान बताउँछन् ।
तर तिहारको समय बारबर्दिया नगरपालिकामा परेको वर्षाले भने भित्र्याउन लागिएको धान क्षति भएको छ । गुलरिया नगरपालिका–९ का किसान अनवर खानले अनुकूल मौसमले धान उत्पादन बढेको बताए। उनले धान भित्र्याएपछि गहुँ र तोरी छर्ने तयारीमा रहेको बताए । गत वर्ष समयमा पानी नपर्नु र धान भित्र्याउने बेला अतिवृष्टिसँगै बाढी आएकोले धान उत्पादन घटेको उनले जनाए ।
आकाशे पानीको भरमा रहेका किसानलाई राहत दिन भेरी–बबई डाइभर्सन चाँडो भन्दा चाँडो सम्पन्न गर्न जरुरी रहेको स्थानीय किसान वृक्षराज चौहानले बताए । सिँचाइ सुविधा भए यहाँ धानको उत्पादन अझै बढ्ने किसानहरुको भनाइ छ ।
Discussion about this post