बाँके माघ १७ गते ।
भेरी अस्पताल र राष्ट्रिय आविष्कार केन्द्रबीच बिग्रिएका उपकरणको मर्मत गर्ने सम्झौता भएको छ । सम्झौता भएसंगै आविष्कार केन्द्रले अस्पतालमा रहेका बिग्रिएका उपकरण मर्मत गर्नेछ । सम्झौता हस्ताक्षर कार्यक्रममा अस्पतालका तर्फबाट प्रमुख मेडिकल सुपरिटेन्डेन्ट डा. निराजन सुवेदी तथा आविष्कार केन्द्रका तर्फबाट अविष्कार अधिकारी, अभिनव आनन्द दत्त र देवेन्द्र कुमार साह सहभागी थिए।
भदौ ५ गते स्वास्थ्य तथा जनसंख्या मन्त्रालयले राष्ट्रिय आविष्कार केन्द्रसँग बिग्रिएका उपकरण मर्मतको सम्झौता गरेको थियो । उक्त सम्झौता अनुसार देशभरका १७ वटा ठूला संघीय अस्पतालमा बिग्रिएर वा प्रयोगविहीन अवस्थामा रहेका स्वास्थ्य उपकरणको मर्मत र उपकरणको अवस्था राष्ट्रिय आविष्कार केन्द्रले पत्ता लगाउने काम अहिले गरिरहेको छ ।
त्यसैक्रममा भेरी अस्पतालसंग पनि सम्झौता भएको हो । बिग्रिएको उपकरण कसैले मर्मत गर्न तयार नहुने भएकाले आफूहरुले सेवा भावको हिसाबले काम गरिरहेको केन्द्रका अविष्कार अधिकारीले बताए । ‘अस्पतालमा जे–जे उपकरण बिग्रिएका छन् । त्यसको मर्मत गर्छौं’, उनले भने, ‘वारेन्टी सकिएको उपकरणलाई बनाउँछौं ।
मर्मत गर्न नसक्ने उपकरणलाई बनाउन सक्दैनौं भनेर सिफारिस गर्छौं ।’ सुरुमा आविष्कार केन्द्रका स्वास्थ्य विज्ञ प्राविधिकले अस्पतालमा रहेका बिग्रिएका उपकरणको अवस्था अध्ययन गरेर मर्मत गर्न सकिने वा नसकिने छुट्याउनेछन् । त्यसपछि अस्पतालले उपलब्ध गराएका मर्मत सामग्रीको प्रयोग गरी मर्मत हुनेछ ।
अस्पतालका प्रमुख मेसु डा. सुवेदीका अनुसार अस्पतालका प्राविधिक र आविष्कार केन्द्रका जनशक्तिले अब बिग्रिएका उपकरण संकलन र मर्मतको लागत अनुमान गर्ने काम गर्ने छन् । सरकारले ठूलो धनराशी खर्च गरेर खरिद गरेका र दाताले दिएका धेरै स्वास्थ्य उपकरणहरु अस्पतालको स्टोरमा थन्किएका छन् ।
Discussion about this post