बर्दिया माघ १८ गते ।
बर्दियाको ठाकुरबाबा नगरपालिकाले खो–खो विश्वकप प्रतियोगितामा सहभागी भई रजत पदक ल्याउन सफल १२ जना खेलाडीलाई नगद सहित सम्मान गरेको छ । विश्वकपमा ठाकुरबाबा नगरपालिकाबाट मात्र महिला र पुरुष गरी १२ जना खेलाडी खो खो विश्वकपमा सहभागी भएका थिए ।
प्रतिखेलाडीलाई प्रमाणपत्र सहित नगद २५ हजार र खेल व्यवस्थापकलाई प्रमाणपत्र सहित १० हजार रुपैयाँ नगद सहित सम्मान गरिएको ठाकुरबाबा नगरपालिकाले जनाएको छ । त्यसैगरी ठाकुरबाबा नगरपालिकाले खेलाडीलाई सम्मान गर्दै भुरीगाउँ बजार परिक्रमा गराउने भएको छ । ठाकुरबाबा नगरपालिकाले खो–खो खेललाई प्राथमिकताका साथ प्रवद्र्धन गरिरहेको छ ।
विश्वकपमा उपविजेता भएका खेलाडीलाई प्रोत्साहन स्वरूप नगद सहित सम्मान गरिएको ठाकुरबाबा नगरपालिकाकी उपप्रमुख विना कुमारी भट्टराईले बताइन् । खेलाडीलाई विहीबार सम्मान स्वरूप बजार परिक्रमा गराउने समेत उनले बताइन् । खो–खो खेलका लागि बर्दियाको ठाकुरबाबा नगरपालिका नेपाल कै प्रमुख मानिन्छ ।
यस क्षेत्रबाट स्थानीय, राष्ट्रिय र अन्तर्राष्ट्रिय गरी करिब दुई सय ५० खेलाडी उत्पादन भइसकेको खो खो संघ लुम्बिनी प्रदेशका महासचिव खगेन्द्र शाहीले बताए । ठाकुरबाबा नगरपालिकामा आगामी फागुन महिनामा खो खो राष्ट्रिय लिग प्रतियोगिताको आयोजना गरिने घोषणा समेत गरिसकिएको छ ।
Discussion about this post