बाँके चैत २० गते ।
बाँकेको राप्ती सोनारी गाउँपालिका–६ डाँडा टेपरीमा हाइसको ठक्करबाट एक बालकको ज्यान गएको छ। मृत्यु हुनेमा स्थानीय पाँच वर्षीय सुगन राना रहेका छन्।
जिल्ला प्रहरी कार्यालय बाँकेका प्रवक्ता डीएसपी दिपक पातलीका अनुसार दाङबाट नेपालगञ्जतर्फ आउँदै गरेको भे १ ज १५०५ नम्बरको ईभी हाइसले शुक्रबार बिहान करिब ११ः३० बजे सडकमा हिँडिरहेका रानालाई ठक्कर दिएको थियो। गम्भीर घाइते भएका बालकलाई तत्काल उपचारका लागि नेपालगञ्जस्थित भेरी अस्पताल लगिएकोमा उपचारकै क्रममा दिउँसो करिब १ बजे मृत्यु भएको उनले जानकारी दिए।
दाङको लमही नगरपालिका–५ का अजय केसीले चलाएको उक्त हाइस दुर्घटनापछि फरार भएको थियो। प्रहरीले भागेको सवारी साधनलाई डुडुवा गाउँपालिका–कम्दी क्षेत्रबाट नियन्त्रणमा लिएको जनाएको छ। घटनाबारे थप अनुसन्धान भइरहेको प्रहरीको भनाइ छ।
यसैबीच, बालकको मृत्यु पश्चात आक्रोशित स्थानीय बासिन्दा तथा आफन्तहरूले विरोध प्रदर्शन गर्दै नेपालगञ्ज–अगैया हुलाकी सडक अवरुद्ध गरेका छन्। स्थानीयका अनुसार सडकमा ढुङ्गामुढा राखी सवारी आवागमन पूर्ण रूपमा बन्द गरिएको छ।
Discussion about this post