बाँके वैशाख १ गते ।
नेपालगन्ज–जमुनाह सडक अन्तरगत चौलिका चोकमा नेपाल प्रहरी र सशस्त्र प्रहरीको संयुक्त चेकजाँच सुरु भएको छ । सशस्त्र प्रहरीले मात्र चेकजाँच गर्दै आएको उक्त चोकमा सशस्त्र प्रहरी सँगै नेपाल प्रहरीले पनि चेकजाँच गर्न थालेको हो ।
एकिकृत जाँच चौकी (आइसीपी) र जमुनाहबाट आउने सवारी साधन तथा मालबाहक गाडीको चेकजाँच गर्न सोमवारदेखि नेपाल प्रहरी पनि परिचालन भएको बाँके प्रहरी प्रमुख एसपी अंगुर जिसीले जानकारी दिए ।
चौलिका चोकमा खटिने सशस्त्र प्रहरी र नेपाल प्रहरीको कामका दायरा किटान गरिएको उनले बताए । ‘नेपाल प्रहरीले लागु औषध तथा साना हातहतियार सम्बन्धि चेकजाँच गर्नेछ । सशस्त्र प्रहरीले अवैध रुपमा भित्रिएका सामानको चेकजाँच गर्ने गरि जिम्मेवारी दिइएको छ,’ उनले भने ।
आइसीपीबाट आउने सवारी साधन तथा मालबाहक गाडीबाट लागु औषध र साना हातहतियार भित्रिने खतरा बढेपछि इलाका प्रहरी कार्यालय जयसपुरलाई चौलिका चोकमा चेकजाँच गर्न परिचालन गरिएको एसपी जिसीले बताए । ‘सशस्त्र प्रहरीलाई अवैध सामान चेकजाँच गर्ने अधिकार छ । लागु औषध तथा साना हातहतियार चेकजाँच गर्ने अधिकार नेपाल प्रहरीलाई भएकोले सीमा प्रहरी चौकीलाई परिचालन गर्न परेको हो,’ अनलाइन खोज खवरसँग उनले भने ।
लागु औषध र साना हातहतियार नियन्त्रणका लागि नेपाल प्रहरीलाई परिचान गरिएको एसपी जिसीको भनाई छ । ‘बाँकेमा बढ्दै गएको लागु औषध नियन्त्रण गर्न र आइसीपी भएर साना हातहतियार रोक्न प्रहरीलाई चौलिका चोकमा परिचालन गरिएको छ,’ उनले भने ।
यसअघि पनि चौलिका चोकमा इलाका प्रहरी कार्यालय जयसपुरले छड्के चेकजाँच गर्दै आएको थियो । उक्त समयमा आइसीपीबाट सवारी साधन तथा मालबाहक गाडी आउन सुरु भएको थिएन । ‘आइसीपीबाट आउने सवारी साधन र मालबाहक गाडी चेकजाँच नहुने हुँदा लागु औषध तथा साना हातहतियार भित्रिने सम्भावना बढेपछि नेपाल प्रहरीलाई परिचलान गर्ने निस्कर्षमा पुग्यौँ,’ एसपी जिसीले भने ।
चौलिका चोक क्षेत्रमा चेकजाँच कार्यलाई थप व्यवस्थित बनाउन इलाका प्रहरी कार्यालय जयसपुरबाट प्रहरी टोली परिचालन गरिएको छ । उक्त टोलीको कमाण्ड प्रहरी वरिष्ठ नायव निरीक्षक विष्णु गिरी र प्रहरी सहायक निरीक्षक दिनेशकुमार बिसीले सम्हालेका छन्।
नेपाल प्रहरीले साना तथा मालबाहक गाडीलाई एक–एक गरि चेकजाँच रहेको एसपी जिसीले बताए । ‘लागु औषध तथा साना हातहतियारमा निगरानी गर्न निर्देशन दिइएको छ,’ उनले भने ।
नेपाल प्रहरीले अवैध सामान नियन्त्रण गर्न सशस्त्र प्रहरीलाई सघाउने र लागु औषध तथा साना हातहतियार नियन्त्रणमा सशस्त्र प्रहरीले नेपाल प्रहरीलाई सघाउने भएको छ । ‘दुवै प्रहरी संगठनले एकअर्कालाई सघाउने सहमति भएको छ,’ एसपी जिसीले भने, ‘संयुक्त चेकजाँचले अवैध सामान र लागु औषध तथा साना हातहतियार भित्रिने क्रमलाई रोक्ने आशा गरिएको छ ।’
Discussion about this post