बाँके वैशाख १३ गते ।
नेपालगन्जसहित बाँके जिल्लाका विभिन्न क्षेत्रमा पछिल्लो एक सातादेखि अत्यधिक गर्मी र तातो हावा (लु) चल्न थालेपछि सर्वसाधारणको जनजीवन प्रभावित भएको छ । तापक्रम निरन्तर बढ्दै जाँदा बिहानैदेखि घाम चर्किने र शरीर पोल्ने तातो हावा चल्ने अवस्थाले दैनिक गतिविधि समेत प्रभावित बनेको हो ।
अत्यधिक गर्मीका कारण बजार क्षेत्र तथा ग्रामीण बस्तीहरू दिउँसो सुनसानजस्तै देखिन थालेका छन् । सर्वसाधारणको हिँड्डुल घट्दै गएको छ भने अत्यावश्यक कामबाहेक मानिसहरू घर बाहिर निस्कन छाडेका छन् ।
नेपालगन्ज उपमहानगरपालिका–६ का वडाध्यक्ष समीर प्रताप सिंहका अनुसार पछिल्लो समय बढेको गर्मी र लुले स्थानीयको जनजीवनमा प्रत्यक्ष असर पारेको छ । उनका अनुसार बिहान र साँझबाहेक दिउँसो बाहिर निस्कन कठिन भएको छ ।
गर्मीको प्रभाव सबैभन्दा बढी दैनिक ज्यालादारी गरेर जीविकोपार्जन गर्ने विपन्न वर्गमा परेको छ । अटो रिक्सा चालकहरूले समेत अत्यधिक तापका कारण काम गर्न असहज भएको बताएका छन् । स्थानीय अटो चालक सलीम खाँका अनुसार गर्मीका कारण सडकमा सवारी चलाउन जाँगर कम भएको छ र बेहोस हुने डर समेत बढेको छ । यात्रु संख्या घटेकाले आम्दानीमा पनि कमी आएको उनले बताए ।
मौसम पूर्वानुमान महाशाखाले विशेष बुलेटिन जारी गर्दै लुम्बिनी र सुदूरपश्चिम प्रदेशका तराई क्षेत्रमा आगामी तीन दिनसम्म मध्यमस्तरको तातो लहर (हीट वेभ) चल्ने चेतावनी दिएको छ । केही स्थानमा तापक्रम ४० डिग्री सेल्सियसभन्दा माथि पुग्न सक्ने अनुमान गरिएको छ । बाँके, बर्दिया, कैलाली, कञ्चनपुर, कपिलवस्तु र रुपन्देही जिल्लामा यसको प्रभाव बढी पर्ने सम्भावना छ ।
यसैबीच चिकित्सकहरूले अत्यधिक गर्मीबाट बच्न दिउँसोको समयमा बाहिर ननिस्कन, चिसो स्थानमा बस्न तथा आवश्यक परे मात्र बाहिर निस्कँदा टाउको छोप्ने, टोपी लगाउने र हल्का सुती कपडा प्रयोग गर्न सुझाव दिएका छन् ।
भेरी अस्पतालका वरिष्ठ चिकित्सक डा. सङ्केतकुमार रिसालले शरीरमा पानीको कमी हुन नदिन पर्याप्त मात्रामा पानी, जुस तथा झोल पदार्थ सेवन गर्नुपर्ने बताएका छन् । असामान्य स्वास्थ्य समस्या देखिएमा तुरुन्त चिकित्सकको सल्लाह लिन उनले आग्रह गरे ।
छालारोग विशेषज्ञ डा. कुमार पोखरेलका अनुसार अत्यधिक गर्मीका कारण छाला पोल्ने, एलर्जी तथा घमौरा जस्ता समस्या बढ्ने भएकाले सावधानी अपनाउन आवश्यक रहेको छ ।
Discussion about this post