बाँके वैशाख १३ गते ।
नेपालगन्जमा एक जना कानुन व्यवसायीमाथि हातपात तथा दुर्व्यवहार भएको घटनाप्रति नेपालगन्ज उच्च अदालत बार एसोसिएसन र बाँके जिल्ला अदालत बार एसोसिएसनले गम्भीर आपत्ति जनाएका छन्।
नेपालगन्ज उच्च अदालत बार एसोसिएसनका अध्यक्ष अधिवक्ता पवनकुमार गुप्ता र बाँके जिल्ला अदालत बार एसोसिएसनका अध्यक्ष मेहरसिंह खत्रीद्वारा संयुक्त रूपमा जारी गरिएको प्रेस विज्ञप्तिमा उक्त घटनाबारे जानकारी गराइएको हो। विज्ञप्तिअनुसार, कानुन व्यवसायीमाथि अभद्र व्यवहार र शारीरिक आक्रमण भएको उल्लेख गरिएको छ।
विज्ञप्तिमा जनाइएअनुसार, नेपालगन्ज बार एसोसिएसनकी सदस्य अधिवक्ता दुर्गाकुमारी खड्का शुक्रबार अपराह्न करिब ४ बजे आफ्नो ल फर्म कार्यालयमा बसिरहेको अवस्थामा केही व्यक्तिहरू जबरजस्ती प्रवेश गरेका थिए। उक्त समूहमा प्रतिवादी रूपक विश्वकर्माकी पत्नी शर्मिला विश्वकर्मा, शर्मिला वाइबा भनिने शर्मिला राई, ललिता थापालगायत ७–८ जना महिला रहेको जनाइएको छ।
समूहले कार्यालयभित्र रहेका पुस्तक, मुद्दासम्बन्धी फाइल तथा अन्य सामग्री अस्तव्यस्त बनाउनुका साथै ल्यापटपलगायतका उपकरणमा क्षति पुर्याएको आरोप विज्ञप्तिमा छ। साथै, अपशब्द प्रयोग गर्दै अभद्र व्यवहार र हातपातसमेत भएको उल्लेख गरिएको छ।
घटनाप्रति गम्भीर ध्यानाकर्षण भएको जनाउँदै दुवै बार एसोसिएसनले पेशागत जिम्मेवारी निर्वाह गरिरहेका कानुन व्यवसायीमाथि हुने यस्ता आक्रमण अस्वीकार्य भएको बताएका छन्। दोषीलाई तत्काल कानुनी दायरामा ल्याई कारबाही गर्न तथा कानुन व्यवसायीको जिउ–ज्यान र सुरक्षाको प्रत्याभूति गराउन सरकार, गृह मन्त्रालय, प्रहरी प्रशासन र नेपाल बार एसोसिएसनसँग माग गरिएको छ।
Discussion about this post