बाँके, जेठ ३ गते ।
सशस्त्र प्रहरी बल, नेपाल अन्तर्गत रहेको सशस्त्र प्रहरी जवान तालिम शिक्षालय नौबस्ताले आफ्नो २५औँ स्थापना दिवस (रजत महोत्सव) विविध कार्यक्रमका साथ भव्य रूपमा सम्पन्न गरेको छ ।
रजत महोत्सवको अवसरमा आयोजित विशेष कार्यक्रममा सशस्त्र प्रहरी अतिरिक्त महानिरीक्षक बंशीराज दाहाल प्रमुख अतिथिका रूपमा सहभागी भएका थिए । कार्यक्रममा नेपालगन्ज उपमहानगरपालिकाका मेयर प्रशान्त विष्ट, कोहलपुर नगरपालिकाका मेयर पूर्णप्रसाद आचार्य, बाँकेका प्रमुख जिल्ला अधिकारी दिलकुमार तामाङ लगायत विभिन्न सुरक्षा निकायका उच्च पदस्थ अधिकारी, जनप्रतिनिधि, प्रशासनिक अधिकारी तथा संघसंस्थाका प्रतिनिधिहरूको उल्लेखनीय उपस्थिति रहेको थियो ।
स्थापना दिवसको अवसर पारेर शिक्षालयले खेलकुद तथा बौद्धिक गतिविधिअन्तर्गत फुटबल, भलिबल, ब्याडमिन्टन, टेबलटेनिस, शारीरिक सहिष्णुता, हाजिरीजवाफ तथा अन्तरविद्यालयस्तरीय वक्तृत्वकला प्रतियोगिता आयोजना गरेको जनाएको छ । प्रतियोगितामा उत्कृष्ट प्रदर्शन गर्ने सहभागीहरूलाई पुरस्कार तथा प्रमाणपत्र वितरण गरिएको थियो ।
कार्यक्रममा वक्ताहरूले सशस्त्र प्रहरी संगठनले राष्ट्रिय सुरक्षा, विपद् व्यवस्थापन तथा शान्ति सुरक्षाको क्षेत्रमा पुर्याउँदै आएको योगदानको प्रशंसा गरेका थिए । उनीहरूले संगठनलाई आगामी दिनमा अझ दक्ष, अनुशासित र व्यावसायिक जनशक्ति उत्पादनतर्फ केन्द्रित हुनुपर्नेमा जोड दिएका थिए ।
शिक्षालयले स्थापना कालदेखि हालसम्म संस्थाको विकास र सुदृढीकरणमा योगदान पुर्याउने पूर्व समादेशक, प्रशिक्षक, अवकाश प्राप्त सशस्त्र प्रहरी कर्मचारी, स्थानीय तह तथा सहयोगी संघसंस्थाप्रति आभार व्यक्त गरेको छ । कार्यक्रममा नेपाल एपीएफ स्कुल कोहलपुरका विद्यार्थी, सञ्चारकर्मी तथा स्थानीय सरोकारवालाहरूको पनि सहभागिता रहेको थियो ।
कार्यक्रमको समापनमा आयोजक पक्षले सहयोग गर्ने सम्पूर्ण निकाय तथा व्यक्तिप्रति धन्यवाद ज्ञापन गर्दै आगामी दिनमा अझ प्रभावकारी तालिम सञ्चालन तथा संगठन सुदृढीकरणमा निरन्तर सक्रिय रहने प्रतिबद्धता व्यक्त गरेको जनाएको छ ।
Discussion about this post